NAGSUGOD na ang inisyal nga deliberasyon sa House Committee on Natural Resources, nga gipangulohan ni Rep. Alfredo Marañon III, alang sa House Bill No. 831 nga nagtumong sa pagtino sa opisyal nga coverage sa Chocolate Hills Natural Monument (CHNM) ug sa pag-amendar sa komposisyon sa Protected Area Management Board. Ang maong balaodnong proposisyon nag-uyon usab sa mga lagda ubos sa Expanded National Integrated Protected Areas System (E-NIPAS) law.
Kini human usab mitumaw ang kalabaka sa mga nag-puyo sa Chocolate hills nga na-isyuhan og notice of violation tungod sa pagtukod og estraktura nga walay Environmental Compliance Certificate (ECC).
Si Third District Representative Alexie Tutor, kauban nila Representatives Van-van Cadorna Aumentado ug Baba Yap, mibarug og lig-on nga suporta sa maong bill, ilabi na sa pagkahinanali niini ug sa dakong kalabutan sa panginabuhian ug kalamboong pangkomunidad.
Ang Probinsya sa Bohol, pinangulohan ni Governor Erico Aristotle Aumentado ug SP Committee Chair Board Member Atty. Jamie Aumentado Villamor, nagpamatuod usab sa ilang bug-os nga pagsuporta sa inisyatibo.
Mitambong usab ang mga opisyal sa DENR nga sila PENRO Jose Cleo Colis ug Provincial Legal Officer Atty. Handel Lagunay aron ipasabot ang pagka-urgent sa mga preparatory works, lakip na ang pag-validate sa technical descriptions sa ikoniko nga 1,776 ka bukid sa Chocolate Hills.
Si Tutor, nga mao usab ang chair sa Technical Working Group (TWG), miingon nga makumpleto ang local TWG composition sa dili pa matapos ang tuig, ug ang validation work gilauman nga matapos sulod sa tulo ka bulan.
“Naglaum ug nag-ampo kami nga mahimong malinawon ang dagan sa tanan, ug bisan unsay hagit nga motungha, makapangita kita og paagi nga masulbad kini,” matod ni Tutor.
