USA ka House Bill ang gipasaka sa Kongreso nga nagtinguha sa paghatag og Universal Social Pension alang sa tanang Senior Citizens sa Pilipinas, bisan unsa pa ang ilang financial status o kung nagdawat na sila og ubang matang sa pensyon sama sa SSS, GSIS, o uban pa.
Kini nga balaodnon gilauman nga makahatag og dako nga kausaban sa kinabuhi sa mga Senior Citizens pinaagi sa paghatag og dugang nga pinansyal nga suporta.
Ang tanang senior citizens mahimo nang makadawat og Social Pension. Dili na kinahanglan nga mag-qualify isip “indigent” o kabus.
Ang matag Senior Citizen makadawat og minimum nga ₱1,000 monthly social pension.
Ang tibuok kantidad (FULL amount) madawat sa mga benepisyaryo nga walay bisan unsang kaltas o service fee.
Gipasiugda niini ang pagkaparehas (fairness) ug pagka-inklusive (inclusivity) alang sa tanang senior citizens.
Gitahasan ang National Commission of Senior Citizens (NCSC) sa pagpatuman og mas paspas ug klaro nga proseso sa paghatag sa pensyon sulod sa duha (2) ka tuig.
Magpahigayon og regular nga pag-rebyu matag duha (2) ka tuig aron i-adjust ang kantidad sa pensyon base sa inflation ug kasamtangang kahimtang sa ekonomiya.
Ang pensyon mahimong ihatag pinaagi sa cash payout, remittance, o electronic transfer aron mas sayon alang sa mga tigulang.
Ang mga nagpasiugda niini nga House Bill nag-ingon nga kini nagtubag sa tinuod nga panginahanglan sa mga Senior Citizens ug naghatag kanila og mas lig-on nga suporta alang sa ilang pang-adlaw-adlaw nga panginahanglan.
Ang pagpasar niini nga balaodnon usa ka lakang padulong sa paghatag og mas makiangayon ug inklusibong pagtagad sa atong mga lolo ug lola, kinsa dako og natampo sa katilingban.
