ANG gobyerno gihugma alang ug para sa katawhan — sa kaayuhan niini.
Diha sa atong gobyerno, ana-a ang mga otoridad nga maoy magkontrolar alang sa kahapsay ug kalinaw sa tanan.
Ang usa ka sanga sa gobyerno nga mao ang Huridikatura, maoy tigpahamtang sa hustisya ug musilot sa mga masinupakon sa balaod sa nasud Pilipinhon.
Ang gobyerno usab maoy giila nga mutabang sa katawhan panahon sa kalisdanan ilabina sa kalamidad, gubat ug mga krisis.
Apan ang nakaparat sa atong pang-gobyerno karon nga giharian sa mga politiko nga kurakot ug abusado sa gahum, maoy nagpahagba sa pamuyo sa uban natong kaigsoonan ilabina ang mga kabus nga nalubong ang ekonomiya.
Anaay mga pamilya sa politiko nga nagpuli-puli sa gahum ug walay plano nga mubiya niini.
Wala man siguro’y problema ang daynastiya basta dili lang abusado sa gahum ang mga naglingkod nga pamilya sa politiko.
Masabot nga dili nila gustong mubiya sa puwesto kay mahadlok nga manggawas ang ilang mga bahong gitaguan. O wala pa makuha ang gustong kawkawon sa kaban sa katawhan.
Ug labaw niana, mahadlok nga gukdon sa balaod ug mabilanggo. Dakong kauwaw sa ilang dungog.
Matud sa akong kaila nga politiko, usa ka ligdong nga lider, ang mga lider sa gobyerno nga gustong kanunay hangdon o tahuron o ludhan sa katawhan, anaay usa ka “formula” nga gigamit aron magunitan sa li-og ang katawhan: “poor the people”.
Kun ana-a kanunay sa estado sa kapobrehon ang katawhan, kanunay sila maghangad sa mga salbahis nga politiko aron wiktan og puyrit nga grasya ilabina kun ting-gutom o ana-a sa grabeng krisis.
Ang maong klase sa mga sinugo sa katawhan dili gusto nga mu-uswag o mu-lambo ang pamuyo sa ilang mga ginsakupan.
Ug sa pangutana kun ngano, usa ra ang tubag: aron sila mulungtad sa ilang gipanalipdan nga lingkuranan de gobyerno.
Kun pobre ang katawhan, sayon ang pagkontrolar. Mao kini ang gibuhat sa mga tig-a ug buaya nga politiko.
Daghan ang nangandoy nga makabaton og maayong gobyerno o matang sa pang-gobyerno apan kanunay mapakyas kay ang katawhan mismo wala nipili sa tarong nga mga lider kay niyukbo sa salapi.
Anaay mga tawo nga nipadayag sa ilang sentimento nga dili gayud politika ang solusyon aron matapos ang mga bug-at nga suliran sa nasud nga gihambin sa bagang pundok sa mga kabus — kundi armadong pakigbisog kuno.
Sa armadong pakigbisog, mga kinabuhi ang masayang. Ug lisod ang pagkab-ot sa hustisya. Makita kini sa reyalidad.
Lisod gayud kaayo apson ang mga problema sa katawhan, apan anaay daghan kanato nga nagalaum nga ang mga pinili magtarong sa ilang pangatungdanan.
Atong likayan ang mga lider sa katawhan nga walay gugma sa ilang pagpangalagad. Pait pa’s paliya nga imbes kalambuan ug kauswagan ang lantawon, pobrehon na man hinuon ang katawhan aron makontrol.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Mudawat lamang og seryoso ug dili binuang. Mag-amping kita, mga Bol-anon!
