MINAHAL kung kahigalaan,
Ning panahon sa way kasiguroang kaugmaon, ang mga tinuod nga higala maoy atong kadangpan. Ang kahigalaan maoy atong taming ug katambayayong sa kasakit ug kalipay. Busa, una sa tanan, hugtan ta ang atong panaghigalaay.
Wala pa kita masayud kon pila gayud kita tanan. Ang mga makina dili makasulti sa kamatuoran, ilabi na kung adunay nagpaluyong mga kamot nga dili hikit-an. Kini hinuon ang dayag ug sigurado, atong gi-ambitan ang hugot nga pagtuo sa tiunay ug Kristohanong Gugma nga mas radikal pa kay sa mga pulitikanhong panglantaw, sa Facebook, Tiktok, mga bakak ug pagpanglingla.
Kung atong puy-an kining gugmang radikal dinhi sa atong grupo, moabut ang panahon nga maglaway kadtong wa mahilakip kanato ug bati-on nila ang kaibug kay kita nag-inunongay man. Gusto silang moapil sa atong grupo sa umaabot nga panahon. Apan dili nato sila dawaton kon dili sila maghinulsol ug mobiya sa pagkabakakon ug malinglahon. Hinuon, sayo pa kaayo alang kanato ang pagsulti sa ingon.
Ang atong mahigugmaong lider mismo ang misulti kanato nga dili nato angayng awayon kining mga nailad sa mga bakak ug lingla kay biktima lamang usab sila. Husto siya. Apan tinuod usab nga dili sayon ang pagpasaylo sa mga nanginsulto ug mibiay-biay kanato sa social media ug sa kadalanan.
Dili ta makakumusta sa mga kamot nga kinumo. Una sa tanan, kinahanglan natong batonan ang kalinaw sa atong kasingkasing ug ipadagayday ang maong kalinaw ngadto sa uban, ngadto usab sa mga mibiay-biay kanato. Buwahan, nianang paagiha, adunay paglaum nga malukmay ang ilang kasingkasing ug ato nang makumusta ang ilang abling mga kamot.
Sa pagkakaron, atong paningkamotan ang pagsunod sa ehemplo sa atong lider nga nagtudlo kanato pinaagi sa iyang mga maayong binuhatan. Ang iyang yano ug malinawon nga kinabuhi maoy atong panig-ingnan. Ang iyang mga sakripisyo alang sa atong nasud, ilabi na alang sa mga kabus, usa ka buhing testamento sa Kristohanong Gugma.
Sa atong hustong pagpili, midaug na ta. Usa ka kadaugang moral nga dili masabtan sa mga nailad ug nangilad. Walay dalan paingon sa kalinaw. Ang kalinaw mismo mao ang dalan. Walay panaw paingon sa kadaugan. Ang panaw mismo mao ang kadaugan. Sa maong kahulugan, midaug kita.
Kung magpabiling gitaguan ang kamatuoran, dayag na lang nga ang mosunod nga mga bulan ug katuigan mamahimong lisud. Mas lisud pa kay sa nangaging panahon. Bisan kadtong nangilad, nailad, o ba kaha, sama kanatong mibarug sa kamatuoran, kitang tanan mag-antus sa umaabot nga panahon. Matud sa mga eksperto sa ekonomiya, kon moinsistir ang mga mamunoan pagpatuman sa ilang saad nga P20 pesos matag kilo nga presyo sa bugas, mabangkaruta ang atong nasud. Ang mga mag-uuma maoy unang mahimong biktima.
Apan kana, sinugdanan pa lang. Karon gani, aduna nay mga balita nga gisugdan nag papas ang mga rekord sa kasaykasayan aron tuison ang kamatuoran. Apan kon magpabiling hugot ang atong panaghiusa ug paghigalaay diha sa Kristohanong Gugma ug tiunayng serbisyo, dili kita mabuntog.
Ang atong panultihon karong semanaha gikan kang Jessie Robredo: “Aron magmalampuson ang atong nasud, kinahanglang mamahimong mga bayani ang yanong katawhan”.
