“TANANG politico corrupt”, kasagaran nga komentaryo karong panahona. Pero dili na tinuod. Makasubo gud ang atong politikanhong kahimtang, apan dili tanan korap. Naa pay paglaum ang atong nasud kung kamao ta mopili sa mga nahibilin nga maayo.
Duna pay mga maayong tawo nga nahibilin sa politika, sa ehekutibo, pamalaod ug hudikatura. Duna pay mga tawo sa gobyerno nga motrabaho bisag way padangog, komisyon o kikik. May mga lideres pa nga maayong mobuhat sa ilang trabaho o mandato kutob sa ilang mahimo.
Usa niana ang lider nga akong botohan ugmang adlawa. Siya giila na nga matinud-anon, hanas, responsable sa paggasto sa kwartas gobyerno, ug naghatag og prayoridad sa mga kabus. Matud sa mga frontliners ug trabahante sa mga ospital, siya sab kuno ang ilang botohan tungod kay sa taliwala sa pandemya, samtang ang ubang ahensya wala kahimo o dugayng naka-deliver, ang iyang opisina abtik nga milihuk.
Bisan gyutay ray gigahin sa nasudnong budget alang sa iyang opisina, nakaaghat siya sa daghang mga pribadong ahensya aron motabang sa mga nanginahanglan, ilabi na ang mga naglisud intawn nga frontliners, mga doctors, nurses ug uban nilang kauban sa buhat. Iyang gi-organisar ang mga nabyuda ug na-ilong mga biktima sa extra-judicial killings. Gihatagan niya sila og trabaho panahon sa pandemya.
Ang mga byuda ug ilo gitudloan nila sa pagpanahi. Sila ang nagtahi sa mga PPEs (personal protective equipment) nga giapud-apud sa iyang opisina ngadto sa mga frontliners samtang ang ubang ahensya hinay ang kamas. Sa dihang ang mga frontliners walay kasakyan paingon sa ilang gitrabahoang ospital, mi-abang siya og mga bus aron libre nilang kasakyan. Sa dihang ang mga frontliners walay kapuy-an kay daghang nahadlok nga matakdan, miabang siya og mga dormitoryo aron ilang kapuy-an.
Ang iyang isulti, iyang gayung buhaton. Usa siya ka deboto nga Catolico. Tinuod walay tawong perfecto. Kitang tanan naningkamot pa. Apan dunay pipila, sama kaniya, nga maayo ug buotan gyud. Ilang gipuy-an ang ilang relihiyon o pagtuo.
Usa niana ang tawong akong botohan ugma puhon. Iya ganing gihigugma ang mga kaaway, segun sa gitudlo sa atong Ginoong Hesu Kristo. Posible pa gani nga dili kaaway ang iyang tan-aw kanila, kay bisag sige siyag atakehon sa social media, adlaw ug gabii, pito ka adlaw sa kada semana, unsay iyang tubag? “Huwag natin silang awayin dahil biktima din sila. Sila ang ating ipinaglalaban”.
Kana, maoy tim-os nga Kristohanong Gugma. Talagsaon nga lider! Talagsaong Kristyano! Simple ra sab kaayo ang iyang kinabuhi. Molakaw gani siya sa mga lapok nga agi-anan aron lang mabisita ang mga kabus nga iyang gisilbihan. Magsuot og tsinelas, usahay magtiniil pa gani kung kinahanglan. Kini maoy lider.
Kini akong nakit-an mismo sa akong mga mata. Akong nasaksihan ang iyang mga pagbudlay. Iyang gibuhat ang iyang gisangyaw. Usa ka maayong ehemplo sa Kristohanong Gugma. Busa, ang akong boto alang kaniya, usa ka boto alang sa Kristohanong Gugma.
