CATARMAN, Dauis Bohol, July 25 (PIA)—Gitugyan sa kapolisan, kauban ni citizen Aris Aumentado, kinsa uban ni Kongresista Vanessa Aumentado personal nga naghatag sa ilang mga tinigum aron kapundohan ang Project Libreng Alagad og Balay (LAB); kini ang ika 25 nga libreng balay, ngadto sa banay sa kabus nga si Leslie Ciruela, inahan ug solo nga nangita alang sa 4 ka gagmay pang mga bata para ilang desente nga silonganan didto sa Catarman Dauis.
Wala magtuo si Leslie Ciruela, 39 anyos nga labandera ug suholan sa pagpanghinlo sa mga balay, nga ang iyang pait nga kahimtang, maluwas ra pinaagi sa iyang anak ug sa magtutudlo niini nga magsumpay kanila ngadto sa kapolisan ug sa maayong kabubut-on sa nag-unang banay sa Bohol.
Taga-Ayungon Negros Oriental si Leslie, ug sa iyang pagkakatabang sa Sugbo, naka-ila niya ang iyang mabana nga si Conrado Ciruela Jr., taga Catarman Dauis.
Upat na ang ilang anak, samtang si Conrado Jr., namanday, si Leslie usab nanglabada, abag sa iyang bana aron makapahimutang sa sakto sa ilang banay.
Apan, gisungog sa kapalaran, ug ang iyang bana, nakasohan og homicide, o wala tuyua nga pagkapatay, sa iya ra usab nga higala ug kainum.
Sugod niadto, nagkapilopilo ang suliran sa banay: ang pagpaeskwela sa mga anak, ang pagpaneguro nga may pagkaon sa mga bata ug ang pagpaayo sa ilang balay nga nagusbat sa bagyo ug nagtakilid na sa kabug-at sa ilang hiniusang suliran.
“Niay usa nako ka anak nga ang iyang teacher, si Maam Grace Cabagnot, sila maoy kaila ni Maam Sumaoy,” saysay ni Ciruela, kinsa naghingapin ang kalipay samtang nagtulo ang luha sa pasalamat.
Si Sumaoy, o Police Lieutenant Elma Sumaoy ug si Maam Pabalan, sakop sa Dauis Municipal Police Station, ug lakip sa mga nagpatrolya sa kabarangayan sa pagpatunhay sa kahapasay ug kalinaw.
Sa administrasyon ni Police Provincial Director PSSupt Lorenzo Alfeche Batuan (LAB), iyang gipaningkamotan nga magbilin og legasiya sa kaayo ngadto sa mga kabus, butyag ni Police Senior Master Sergeant Remigio Acedo, kinsa maoy superbisor sa mga mingboluntaryo nga kagawad ug barangay tanod aron maoy magtabang sa pagtukod sa balay ni Ciruela.
Napili si Cirueala, subay sa batakan sa LAB, ang Libreng Alagad ug Balay (LAB) ihatag lamang sa mga Bol-anon nga nagsunod sa balaod (Law Abiding Boholanos).
“Ang LAB, programa ni Police Col LAB diin manghatag ang kapolisan og mga libreng balay sa mga makaluluoy nga sakop sa katilingban, ug kini gipundohan gikan sa donasyon sa mga negosyante ug mga molupyo nga kaabag sa kapolisan sa pagpamaayo sa ilang imahen, ug pag-paduol sa kapolisan sa mga komunidad nga maoy ilang numero uno nga partner batok sa kriminalidad,” dugang ni Acedo.
“Natunong usab nga ang proyekto sa mga kapolisan, hinghaum sa panglantaw sa unang banay sa Bohol: nga pinaagi sa ilang gipundohan nga proyektong libre nga “Balay sa Paglaum,” matud ni Col Batuan, sa usa ka pagpakighinabi.
“Swerte kita, kay kon ang kwarta nga matigum sa kapolisan maoy saligan sa pagpundo sa LAB, pipila lang gyud ang balay nga atong ikatunol,” dugang sa hepe sa kapolisan sa tibuok lalawigan sa Bohol.
Segun sa datus gikan sa Kampo Dagohoy, sa kasamtangan nga 25 ka mga balay sa LAB, 7 lamang niini ang napundohan sa natigum sa PNP, apan ming-abut sa 18 na ang naabut sa donasyon gikan sa bulsa ni Gobernador Erico Aris Aumentado ug ni Kongresista Vanessa Aumentado.
“Dugay na kini nga atong adbokasya, saysay ni Aumentado, apan dili kita buot nga ingnon nga namolitika, mao nga nagkalisud kita sa pagpangita sa mga tawo nga maoy modala niini nga dili masaypan nga namolitika. Pagkadungog nato sa LAB sa kapolisan, nakita nato ang ka sinsero sa kapolisan ug nga kini, haum usab sa atong panglantaw ni Vanvan,” dugang ni Aumentado.
Grabe, wala ko masayud nga ang akong anak nga nag-eskwela sa Mayacabac Elementary School, maoy makasumpay kanamo ni Maam Grace Cabagnot, kinsa, ambot lang og unsay ilang relasyon ni Gob Aris Aumentado kay Cabagnot baya pod siya, apan di katupngan ang atong pasalamat sa atong kapolisan nga mao gayud ang nagpasugod, sa mga kagawad ug tanod sa Barangay pinangulohan ni Kapitan Dondon Dulalas, sa among mga silingan nga minghatag sa ilang mga tabang ug pag-abag, nga mahatagan kami niining balay, butyag ni Ciruela, atul sa pagtugyan niini.
Alang kang Ciruela, kinsa sa usa ka higayon sa iyang kinabuhi nga andam nan ga motahan og mouli na lang ngadto sa Negros, dala sa kalisud, ang pagtanyag sa kapolisan sa libreng balay, maoy nagpahinumdom kaniya, nga bisag halayu sa iyang pamilya, wala ang bana kay nagsilbi sa iyang salaud, may mga Bol-anon nga may maayong kabubot-on nga iyang kanunay nga kawilihan, ug dili niya katalikdan. (PIABohol)
