GIKLARO ni kanhi Tagbilaran City mayor Dan Neri Lim nga complaint affidavit ang iyang gipasaka sa Ombudsman Manila batok kang Gob. Arthur Yap tuig na karong adlawa kalabot sa gialegar nga anomaliya sa pagpalit og mga motorsiklo ug ubang mga kagamitan.
Kini ang giklaro sa kanhi mayor atol sa iyang programang Kinabuhing Bol-anon Batok Covid-19 karong bag-o sa wala pa musugod ang local nga kampanya kaniadtong Marso 25.
Unang gipahayag sa mga tigpamaba ni Yap sa nagkadaiyang sibyanan ning syudad ug sa Sugbu nga dili pa complaint ang gipasaka ni Lim kon dili naghangyo lang sa Ombudsman for investigation ug siya miingon nga kini politically motivated.
Apan matod ni Lim nga dili lang ‘request for investigation’ ang iyang giduso sa Ombudsman apan usa sab ka complaint nga gipatabanan og mga ebidensiya nga matod niya angayang tubagon ni Yap.
Unang gikuwestiyon ni Lim kon nganong sa Cabuyao, Laguna gipalit ang mga motorsiklo nga duna may mga supplier dinhi sa Bohol nga masegurong barato ra ang presyo.
Giklaro sab ni Lim nga way pamolitika ang iyang lakang kon dili kabahin lang sa iyang pagpakabana sa katawhang bol-anon.
Si DNL subli nga magpapili pagka-mayor sa syudad sa Tagbilaran sa umaabot nga piniliay sa Mayo 9 ubos sa Team Substitution ug Abante Tagbilaran. (RTB)
