KAPULISAN sa syudad sa Tagbilaran ug lalawigan sa Bohol nihulagway nga malinawon ang pagsugod kaniadtong, Marso 25, sa 45 ka adlaw nga kampanya sa mga lokal nga kandidato.
Tanang nagpapili sa lainlaing local nga posisyon sa siyudad nihimo og kalihukan sa unang adlaw sa pagsugod sa kampanya uban sa ilang mga dumadapig.
Kaadlawon pa lang, ang kapulisan sa dakbayan nipakatap na sa ilang mga personnel sama sa simbahan ug kadalanan nga maoy rota sa caravan sa mga kandidato.
Tungod niini, nanghinaot sila nga magpadayon kini hangtod mahuman ang eleksyon sa Mayo nga walay bisan usa ka insidente nga may kalabutan ang politika.
Wala usab nakabantay ang City PNP nga dunay nakalapas sa health protocol bisan kon ningdagsa ang mga dumadapig sa matag kandidato.
Matod sa kapolisan sa syudad nga adunay mga pulis nga nagbantay niini inabagan sa mga tanod ilabi na kon mosuroy ang politiko sa nagkadaiyang barangay sa siyudad nga molusad og campaign sorties.
Samtang sa lalawigan sa Bohol gihulagway usab sa Bohol Provincial Police Office (BPPO) nga nagbasi sa Kampo Dagohoy nga malinawon ang pagsugod sa pagpangampanya sa mga kandidato.
Matod sa BPPO nga ilang gi-maximize ang tanang mga pulis sa kalungsuran nga mohatag sa area security apan wala usab nila biyai ang ilang anti criminality campaign nga kabahin usab sa ilang pagpangandam sa eleksyon sa Mayo 9.
Giandam usab ang personnel nga maoy nagsilbing quick reaction team nga moresponde kon dunay insidente nga mahitabo.
Ang nasudnong campaign period nagsugod niadtong Pebrero 8. (RTB)
