ALARMING na ang paghulagway sa ikaduhang labing-labaw nga opisyal sa Bohol kalabot sa kainit sa panahon nga nasinati karon dili lang sa Bohbol kon dili tibook Kabisay-an ug Mindanao.
Si Bise-gobernador Dr. Dionisio Victor A. Balite, Ph.D nibutyag nga angay lang nga mohimo na og lakang ang katawhan aron malikayan ang kadaot sa grabe nga kainit.
Sigon ni Balite nga usa na dinhi nga malikayan ang panghitabo nga sunog diin sa mga panghitabo nga sunog motumaw kini ini’g tungtong sa alas-10 sa buntag hangtud sa alas-3 sa hapon nga mao ang grabe nga pag-igo sa kainit.
Nipahimangno si Balite ngadto sa katawhan nga mag-inampingon pinaagi sa paglikay sa pagdaob ug pagpataka og labay sa mga upos nga sigarilyo.
Sa pikas bahin, mitambag ang bise-gobernador sa pagpahigayon og panagtigom sa mga sakop sa Local Disaster Risk Reduction and Management Council sa mga kalungsuran ug dinhi sa syudad sa Tagbilaran.
Kini sa tuyo nga mahisgutan ang mga lakang nga pagahimoon alang sa pagpangandam sa pag-igo sa La Niña human niining nagbagang kainit karon sa panahon.
Si Balite unang miluwat sa iyang mga sugyot pagpadayon sa paghingusog sa mga pahimangno sa mga molupyo sa Bohol labot sa paglikay gyod kanunay sa mga butang nga makasunog.
Dugang pa ni BG Balite nga angayan gayod kining pagahimoon tungod sa nasinati karon nga hilabihan nga kainit sa panahon nga dali kaayong makasunog. (RTB)
