TAGBILARAN CITY, Bohol (PIA) –Aduna nay hapit na mahuman nga ‘grand mosque’ alang sa mga igsoon nga Muslim dinhi sa Bohol, kini maoy gibungat nga kasayuran ni Police Corporal Jonald “Abdul Salaam” Avinido, didto sa senimana nga programa sa kapolisan sa Bohol nga makita sa livestreams a PIA Bohol matag Martes.
Ang Masjid Nur, tulo ka andana nga kapilya nga alampu-anan alang sa mga Muslim, makit-an sa Catigbian, Bohol ug kini gipatukod sa usa ka retirado nga pulis ug aktibo nga tigsuporta sa Salaam Police Advocacy Group (SPAG).
Si retired Police Brigadier General Jonas M. Ejoc nga mismo taga Catigbian ang nagpundo sa pagtukod sa masjid, o katumbas sa kapilya sa mga Katolikong Kristiano, apan sanglit kini na ang labing dako nga alampu-anan sa mga Muslim sa tibuok Bohol, isipon na kini nga grand mosque, pasabut ni Police Corporal Avinido, kinsa usa na usab ka imam, o pastor sa mga Muslim.
Sa senimana nga Strategic Information Broadcasting through the Internet and other Access (SIBIA), si Avinido nagpasabut usab sa pagsubay sa Ramadan, o sagrado’ng buwan sa pag-ampo sa mga Muslim.
Sa pagka-karon, gisugdan na ang pagsunod sa Ramadan sa tanan nga mga muslim sa Pilipinas ug ang gibansay nga pag-ampo ug pagpu-asa, gipaabut nga sundon sa tanan nga miangkon nga Muslim.
Sa bansay sa mga Muslim, ang Ramadan, usa ka buwan nga pagtamud sa mga Muslim sa gituohan nga niining panahona, ang balaan nga libro sa mga Muslim nga Koran (Qur’an) gitugyan gikan sa langit ngadto sa katawhan isip sumbanan sa kalalakinhan ug kababayenhan sa mga gimbuhaton isip maoy agi-anan ngadto sa kaluwasan.
Atul sa Ramadan, ang mag muslim magbansay sa estrikto nga pagpu-asa, gikan sa kaadlawon, ngadto na sa pagsawop sa adlaw.
“Magsugod ang pag-puasa human sa tawag sa pag-ampo nga ipalanog sa alas 4:00 sa sayu nga kabuntagon ngadto na sa pagsawop sa adlaw,” dayag ni Corporal Avinido.
Sa pagpuasa, wala sila tuguti sa pagkaon ug pag-inom bisag tubig sa panahon sa adlawan pa.
Ug bisan kon ang pagpuasa sa mga muslim, us aka personal ug pribado nga buhats a pag-ampo ug pagdayeg sa sa ilang gituohan nga labaw nga makagagahum, kini us aka matang sa disiplina sa kalag ug panahon sa pagpakighiusa sa mga walay makaon.
Taposon ang adlaw sa pagpuasa uban sa pag-ampo ug bangkete nga gitawag og iftar, ug pagkap-os pa niini, mosuroy sa mga higala ug kabanay.
Sa Ramadan usab, mangadto ang nga Muslims sa mga mosque ug mag-ampo sa pipila ka oras, dili lamang sa 5 ka matag adlaw nga ampoonon, apil an usab ang pag-ampo sa gabii og tarawih (night prayer).
Sa mga Muslim communities sa Bohol, pipila na kanila ang mga may kapilya o masjid, samtang ang uban, may musalla nga mga kwarto nga alampo-anan, samtang may direksyon na nga gibutang nga mag-atubang ang moampo sa Mecca.
Ang mga Muslim Masjid igkita sa Muslim Village sa Tagbilaran, Sa Islamic Community sa Poblacion 3, sa Darussalam Community sa Poblacion 1, duha sa Jagna diha sa Maranao Community ug sa Tausug Community, usa sa Ubay samtang may mga musalla sa Cabulijan Tubigon, ug sa Unitop community sa Tagbilaran.
Si Corporal Avinido, kinsa us aka Balik-Muslim, midugang sa pag-ingon nga ang Salaam Police Advocacy Group (SPAG) mahimong maduol sa mga kaigsuonang Muslim sa ilang mga panginahanglan sa alampoanan, ug ikauban sa mga paghandum sa Ramadan. (PIABohol)
BALIK MUSLIM. Si PCorp Jonald Evinido, kinsa usa na ka imam sa iyang masjid sa Tagum Sur Trinidad, mibutyag nga may mga masjid na dinhi sa mga muslim communities sa Bohol, ug labing menos may musalla sila alang sa mga tulumanon sa pag-ampo sa mga Muslim. (PIAbohol)
