TAGBILARAN CITY, Bohol (PIA) –Bisan pa og accredited ug registered na sa Securities and Exchange Commission (SEC) and usa ka kompanya, magkinahanglan pa gihapon kini og lain pang lisensya aron makahimo sa pagpangampanaya alang sa dugang mamumuhunan.
Kini maoy gitataw sa SEC pinaagi ni Information Officer Dione Drew Diano didto sa Kapihan sa PIA nga gi streamed live sa PIA Bohol facebook ug youtube channels, Marso 13.
Ang SEC maoy ahensya sa kagamhanan sa Pilipinas nga natahasan sa pagpangrehistro ug pagdumala sa mga korporasyon ug mga securities, lakip na ang mga institusyon nga nagnegosyo sa pamuhunan ug mga institusyon, lakip na usab ang mga ming-apil niini.
Samtang ang mga micro, small ug medium enterprises nga ikaw lamang ang tag-iya, marehistro sa Department of Trade and Industry aron mahatagan ka og legal ug eksklusibo nga katungod sa paggamit sa business name sulod sa 5 ka tuig, kon buot na nimo nga maghimo og stock o non-stock corporation, o partnership, adto na kini marehistro sa SEC.
Sa SEC, ang mga rehistrado nga kompanya, makaangkon na sa juridical personality, nag maghatag sa mga tag-ia niini sa limitado nga liability ug maghatag pa gihapon kanila sa dugang kahigayunan nga makahimog transaksyon sa uban nga ahensya sa goberno, samtag makahimo gihapon sa pag-angkon og dugang pang mga kabtangan, pasabut ni Diano.
Apan alang sa mga kompanya nga manginahanglan pa og dugang puhunan aron makapadaku sa ilang kompanya, ilang gigamit ang ngalan sa SEC sa pagpang solicit og dugang puhunan.
Ang publiko gipahibaw nga ang pag isyu sa Certificate of Incorporation sa SEC, kini maghatag lamang sa kompanya sa juridical personality ug dili apil niini ang katungod ug otoridad o lisensya alang sa korporasyon nga maghimo og mga kalihukan nga manginahanglan pa og secondary license sama sa pag-isyu, pagtanyag ug pagpamaligya sa securities ug pagpahigayon og pagpanawat sa dugang puhunan o capital, matud sa SEC.
Gawas sa secondary license nga gikinahangan sa kompanya aron makapangayo kini og dugang puhunan gikan sa mga mamumuhunan, kinahanglan usab nga ang mga empleyado sa komanya nga maghimo sa pagsolicit sa investments, may gihuptan nga kaugalingon nga lisensya isip capital market professionals.
Sama sa negosyo sa real estate nga gikinahanglan nga himoon sa mga lisensyado nga real estate brokers lamang, ang pag generate og capital alang sa kompanya kinahanglan nga himoon sa mga may lisensya sa pagtigum og capital, dasun sa information officer.
Sang SEC mipahigayon sa Bohol sa ilang Capital Formation Roadshow samtang ilang gipasabut ang mga pamaagi unsaon sa usa ka listed company nga makakuha og capital.
Gihisgutan didto ang crowdfunding solutions ug ang stocks listing. (rahc/PIA_7/Bohol)
