TAGBILARAN CITY, Bohol (PIA) –Highly compartmentalized, ug wala mag-ilhanay ang mga nanglihok sa illegal nga drugas, ilabi na dinhi sa Bohol.
Kini usab nga pamaagi sa sekreto nga patigayun sa ilegal nga drugas, og nahimong kini usab ang gisakyan nga pamaagi sa mga tinugyanan aron sumpoon ang illegal nga patigayun.
Segun pa ni Police Lieutenant Colonel Norman Nuez, atul sa online streaming sa regular nga programa sa Philippine National Police (PNP) Bohol Provincial Police Office (BPPO) Community Affairs and Development Unit (PCADU) nga Strategic Information Broadcasting through the Internet and other Access (SIBIA), dili mag-ilhanay ang naa sa patigayun, aron kon magkina-unsa, wala’y masumbong ug ikatug-an ang madakpan.
Kon i-abut sa kahigayunan nga masakpan na ang local nga distributor, ilabay na usab ang SIM ug magsugod na usab og kuha og lain na usab nga contact, segun sa kasayuran sa PNP.
Si Col Nuez, kinsa maoy usa sa mga anchors sa programa, mihimo og reaksyon sa pamikil-politika sa mga nanaway sa kapolisan ug sa lokal nga administrasyon sa nagka daghan nga drugas ug engkwentro talis sa mga rebelde ug tinugyanan sa balaod.
Unsa man diay ning daghang dakop, daghang encounter, buot ipasabut nga naglihok ang kapolisan ug kasundalohan.
Kusog ang haylo sa drugas, matud pa ni Nuez, dili lamang s amga manggamitay, apan usab sa mga nagpatigayon niini.
Modawat og P50 mil ang usa ka nagpatigayun sa illegal nga drugas nga makahurot sa pagtunol sa usa ka kilo, ug kon kaya sa usa ka tawo makahurot og pahalin sa upat ka kilo sa usa ka buwan, mosapi kini og P200 mil sa matag buwan.
Dili mag-ilhanay ang tanan, usa ka tawag ra ang madawat sa local nga kontak, nga magtug-an diin kuhaon ang ilegl nga drugas, tipigan kini ug maghuwat na sa instructions kon unsaon pagdispatsar ang epektos.
Manawag na usab ang nagpadala sa drugas, aron magmandu sa pamaagi sa pagbahig, dayun sa pag-hatud ug pagtunol sa mga epektos, ngadto sa usa ka tawo nga dili usab niya kaila.
Apan bisan pa niini, tumbok ni Col Nuez, dako ang pamuhunan ni Gob Erico Aristotle Aumentado sa pagpa-askil sa kapolisan ug sa pagpangita sa mga kasaligan nga kasayuran aron sudlon ang grabe ka compartmentalized nga sistema sa patigayun sa illegal nga drugas.
Ang resulta, dinagko na masakpan nga mga pagpadagan sa binulto nga drugas, pahinumdom sa opisyal.
Gani, gipanawagan usab sa opisyal ngadto sa kagamhanan nga seryosohon na ang pagpatuman sa SIM registration diin ikuyog na ang SIM nga gigamit sa nasudnong identification, aron mas dali pagtumbok sa tag-iya sa sim nga gigamit sa illegal nga kalihukan.
“Mahal ang pagkuha sa kasayuran ug wala ihikaw sa gobernador ang pamuhunan aron makuha sa mga tinugyanan ang kasayuran nga makuha ang mga nagpatigayun niini,” saysay ni Col. Nuez.
Ug gawas pa, ganado ang kapolisan nga nakabati sa kasibut sa gobernador sa paghatag sa kay kinutuban nga suporta ngadto sa mga tinugyanan, matud sa opisyal.
Sa estoryahon sa counter-insurgency, kon may mas daghan pa nga encounters ang nahitabo sa panahon niining Administrasyon ni Aumentado, kana kay mas init ang paningkamot sa administrasyon nga undangon na ang armadong panagbangi aron may kahigayunan na ang kalinaw ug kaugmaran. (PIABohol)
