NAKASINATI og pagkunhod sa supply sa tubig ang Bohol Water Utilities Incorporated (BWUI) tungod sa nagpadayong dry spell tungod sa El Niño phenomenon.
Sumala sa Philippine Atmospheric, Geophysical, and Astronomical Services Administration (Pagasa), ang dry spell gihulagway nga sunodsunod nga tulo ka mga buwan nga ubos ang gidaghanon o volume sa uwan.
Kon molungtad sa sunodsunod nga lima ka buwan, dugang sa Pagasa, mao na kini ang gitawag nga huwaw o drought.
Gawas sa El Niño phenomenon, nisulod na usab karon ang panahon sa ting-init nga nakapadugang sa kanihit sa tinubdan sa tubig.
Niingon ang BWUI karong bag-o nga ilang naobserbahan nga nagnihit na ang supply sa tubig sukad pa sa katapusang quarter sa miaging tuig.
Ang BWUI usa ka nag-unang water utility company, nga nagserbisyo sa pipila ka bahin sa dakbayan sa Tagbilaran, mga lungsod sa Balilihan, Corella, Dauis ug sa Panglao.
Ang BWUI daan nang nipasidaan sa publiko sa pagdaginot sa paggamit sa tubig, samtang naningkamot ang ahensiya sa pagkuha og dugang tinubdan sa tubig. (RTB)
