MOUMOL ang kagamhanan sa Lalawigan sa Bohol og ordinansahon nga mag-regulate sa kaugmaran sa mga protected area lakip na ang chocolate hills nga gideklara nga UNESCO Heritage Geopark aron dili na masubli ang susama nga isyu sa usa ka resort development sa maong dapit.
Matud ni Governor Erico Aristotle Aumentado nga nigawas sa ilang pakisusi nga gihimo sa provincial board nga titulado ang luna nga gi-develop apil na ang bungtod diin adunay resolution gikan sa Protected Area Management Board (PAMB).
Gibutyag ni Aumentado nga giaprobahan usab sa Department of Environment and Natural Resources ug aduna usab kini mayor’s permit ug kulang nalang mao ang Environmental Compliance Certificate (ECC).
Ang maong resort gipaubos sa temporary closure apan wala makadawat og kopya niini ang kagamhanan sa Probinsiya sa Bohol.
Matud usab ni Aumentado nga niadtong MARSO 13, 2024 pa sila gipahibalo sa regional director sa DENR nga nag-isyu sila og cease and desist order.
Si Aumentado nagkanayon nga giton-an na sa legal team ang lakang nila mahitungod sa operasyon sa resort apan giangkon niini nga maglisod ang LGU gumikan kay legal ang pagpana-iya sa luna nga nanag-iya niini.
Sa pagkakaron, ang gobernador nirekomendar nga moumol og ordinansa aron kapanalipdan ang mga protected areas sa lalawigan ug lakip usab sa ilang umolon ang team nga molangkub sa regulatory body nga motutok sa pagpatuman sa policy ug guidelines sa tanang kalihokan nga makaapekto sa dapit.
Giingong dili lang ang maong resort ang isyu karon diin aduna pay laing mga land development sa Chocolate Hills nga ilang gitutokan.
Gihangop ni Aumentado ang pagpanginlabot sa senado sa Captain Peak Resort. Si Aumentado bag-o lang nangulo sa Regional Development Council Meeting diin usa sa iyang gikatagbo ang Assistant Regional Director sa DENR-7 Dr. Eddie Llamedo.
Nunot niini, si Senador Cynthia Villar nibutyag nga moduso siya og resolution aron masugdan dayon ang imbestigasyon sa senado kalabot sa controversial nga resort.
Matud ni Villar nga gusto nilang masayran ang estorya niini ug kinsa usab ang mga nalambigit diin nahatagan og pagtugot ilabi na nga kabahin kini sa heritage nga gideklara sa UNESCO.
Dugang ni Villar nga gusto nila nga ipaubos sa imbestigasyon aron dili na kini masubli tungod kay sayod siya nga dili lang ang maong dapit ang posibleng adunay problema apan kini lang ang natuki tungod kay ilado man ang maong dapit. (RTB)
