GIAGHAT sa kanhi komisyuner sa National Youth Commission (NYC) ug kanhi administrador sa Cooperative Dev’t. Authority (CDA) Benjie ‘Bobong’ Sanchez-Oliva ang mga ginikanan nga kanunay magbantay alang sa ‘cyber exposure’ sa ilang mga anak aron masiguro nga luwas ang paggamit sa internet subay sa pagsaulog sa nasud sa Safer Internet Day Philippines (SIDPH) karong bag-o.
Sumala pa ni Oliva nga niining panahon sa ‘digital age’ ang mga ginikanan adunay mahinungdanon nga papel sa pagsiguro sa mga bata batok sa katalagman nga dala sa dili responsable nga paggamit sa internet.
Gipasabot ni Oliva nga usa sa mga hulga mao ang online nga sekswal nga pang-abuso ug pagpahimulos sa mga bata nga kinahanglan hatagan sa dinaliang solusyon.
Nasayran niini nga gisaulog sa nasud ang Safer Internet Day Philippines (SIDPH) karong bag-o ug ang Inter-Agency Council Against Child Pornography (ICACP) sa iyang lungsod sa Catigbian ang aktibo kini nga misalmot sa kalihukan pinaagi sa ‘online zoom’.
Nanawagan usab si Oliva sa tanang ginikanan nga dili dayon hatagan ang kabataan sa nagkadaiya ug mahalong ‘gadgets’ nga magamit sa mga online games sama sa mobile legends nga daghan nang naungo.
Dugang niini nga malooy siya sa ubang ginikanan nga dili na gani paminawon sa ilang mga anak sa higayon nga sugoon kini.
Gipasabot ni Oliva nga dili gyud maayu sa kabataan ang kanunay nga pagyampungad sa internet tungod kay daghan ang mga binuang sa social media nga posibling makadani kanila sa pagbuhat sa ingon.
Samtang midugang kini nga sigon sa pagtoon, apektado ang psyhco-social development ug health condition sa kabataan nga sayo pa nag-gamit na sa internet. (RTB)
