GIAPROBAHAN sa House Committee on Health niadtong Enero 31, 2024 ang House Bill No. 9832 nga magtukod sa Panglao Island Medical Center. Ang balaodnon gisang-at ni Cong. Edgar Chatto niadtong Enero 24, 2024.
Ang maong balaudnon naglatid sa pagtukod ug 200-bed capacity nga ospital nga pagadumalaon sa Department of Health (DOH).
Ang giplanohan nga medikal nga pasilidad gilantaw nga epektibong makatubag sa mga panginahanglanon sa serbisyo sa panglawas dili lamang sa mga residente sa Panglao kon dili lakip na sa lokal ug internasyonal nga mga turista.
Ang sugyot nahiuyon usab sa mas lapad nga rehiyonal ug nasudnong mga katuyoan sa kalamboan nga gilatid sa DOH, giingon sa explanatory note sa balaodnon.
Si Chatto miingon nga ang lakang nagpakita sa pasalig ngadto sa pagpauswag sa mga imprastraktura ug serbisyo sa pag-atiman sa panglawas, nga gikinahanglan alang sa malungtarong pagtubo ug kauswagan sa tibuok rehiyon.
Una na niyang gitaho nga nakig-estorya siya sa Local Government Unit sa Panglao pinangulohan nila ni Mayor Boy Arcay ug Bise Mayor Noel Hormachuelos uban ni DOH Regional Director Dr. Jaime Bernadas alang sa pagtukod sa gikinahanglan kaayong health facility.
Una na usab nga gisusi ni Chatto ang gisugyot nga lokasyon sa medical center atol sa groundbreaking sa proyekto sa Panglao Super Health Center. (RTB)
