ANAAY MGA POLITIKO nga taphaw ang pagsalig sa ilang mga lider sa ubos, partikular sa kalungsuran ug kabarangayan.
Usa sa hinungdan niini kon ang mga ana-a sa taas, dili kongkreto ang relasyon sa ilang mga sinaligan sa usa ka lungsod.
Ngano man nga ingana man? Tungod kay mahadlok usab nga kontrahan og ayo sa ana-a sa pikas hut-ong ilabina kon anaay koneksyon usab.
Mao kini ang gikompisal diri kanako sa usa ka politikong ligdong ang prinsipyo ug baruganan.
Sa iyang tono, nawad-an siya og gana sa politika. Ug naduhigan ang iyang ngalan nga kaniadto mas hayahay ug layo sa presyor.
Non-verbatim: “Ilahang interes (mga dagkong politiko) ra gihapon ang gipalabi. Kita ra gihapon nga ana-a sa ubos ang makaluluoy,” sukmat niya.
“Kanunay lang ‘ta nangampo nila, apan wala dungha,” dugang niya.
Apan sa akong pagsabot sa iyang mga pagsaysay sa kasinatian sa pagtamak nataran sa politika, wala siya nagmahay sa mga panahon nga nakaalagad kini sa katawhan, kay kadto pulos tim-os ug tinud-anay.
Matud niya, ang usa sa makaguba sa usa ka pundok mao ang interes nga naghari sa mga kauban niini: interes sa gahum, kuwarta, impluwensya o dungog sa kaugalingon.
Mao ra gayud kuno kana ang kasagarang unod nganong ang uban interesado sa politika. Tuyok-tuyok nga interes.
Nga buot pasabot, pipila lang gayud nga mga lider sa gobyerno ilabina kon pinili sa katawhan ang anaay gugma ug katakus sa pagpanerbisyo, the rest, pulos ra kaugalingong interes o kabulahanan ang giapas.
Dugang niyang katarungan, ang mga ana-a sa taas, dili na kaayo molingi ilabina kon nagmadaugon na sa Eleksyon. Maayo lang kuno sa istorya. Kon ana-a may mga tarong, maihap ra’s tudlo.
Iyang pag-analisar, kon mosulod man gani sa kalibutan sa politika, magpalig-on na lang og siguro sa ubos ilabina sa barangay, aron kon magkinaunsa ang relasyon sa taas, dili na sayon-sayon nga matarog ang pundasyon sa usa ka grupo.
Mao gayud kana ang reyalidad sa pamulitika ug pang-gobyerno. Mawad-an na og pagtagad sa ubos kon ana-a na sa poder o posisyon ang uban, kon dili man kadaghanan sa mga politiko.
Iyang pangagpas, kon magpapili man gani, ok ra kon nanobra ang salapi.
Kay ang dayag karong panahona, kuwarta gayud maoy giapas sa katawhan, kon kinsa ang dako og hatag maoy modaug. Kasagaran.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
