NIPASIDAAN ang Bohol Chamber of Commerce and Industry (BCCI) sa publiko batok sa peke nga dili awtorisado nga mga transaksyon ug online bookings sa mga hotel ug resort dinhi.
Ang presidente sa BCCI nga si Dominic Butalid nibutyag nga ang mga scammers ug hackers bag-o lang nakabiktima sa kliyente sa Henann Resort Panglao pinaagi sa pag-peke sa online booking platform sa resort aron maka-transact sila sa biktima.
Karong bag-o, usa ka turista ang nalingla sa pagbayad sa kantidad nga P105,000 pinaagi sa PesoNet electronic fund transfer human mag-book sa maong peke nga online site sa Henann.
Ang biktima nga nagpaila sa iyang kaugalingon nga si Annabel Blanco Fleischlin, nipadayag sa iyang kalagot sa iyang Facebook post kalabot sa insidente ilabina kay una pa kini niya nga higayon dinhi sa Bohol.
Walay komento ang management sa Henann Resort ug miingon lang nga sila dili pa makahimo og opisyal nga pamahayag tungod kay ang legal department sa ulohang buhatan niini maoy nagdumala sa maong butang.
Apan, ang kasaligang tinubdan nitug-an nga ang Henann Resort nakigtambayayong na sa cyber-crime units sa National Bureau of Investigation (NBI) ug Philippine National Police (PNP).
Sumala sa tinubdan, ang online booking site ni Henann dayag nga “na-clone” sa mga hacker ug scammers nga nakahimo sa pagdani sa mga turista nga mag-book pinaagi sa ilang peke nga website.
Si Butalid niingon nga ang BCCI mopagawas pa ug advisory labot sa maong butang. (RTB)
