NANGITA ang kagamhanan sa dakbayan sa Tagbilaran og mga paagi sa paghawan sa mga obstructive parking nga mga sakyanan sa naghuot nga mga dalan sa downtown pinaagi sa pag-convert sa mga bakanteng lote ug pinili nga mga dalan ngadto sa pay parking area.
Si City Councilor Eliezer Borja, chairman sa Sangguniang Panlungsod (SP) committee on Peace and Order and Public Safety, miapelar sa mga tag-iya sa mga bakanteng luna dinhi sa dakbayan nga tugotan ang pagkonbertir sa ilang mga propyedad ngadto sa pay parking area.
Ang pagkonbertir sa mga pribadong bakanteng lote ug bisan sa pinili nga mga dalan ngadto sa mga luna alang sa pag-parking sa mga sakyanan dako kaayog ikatabang sa kampanya sa kagamhanan sa dakbayan sa paghawan sa central business district sa mga obstruction sa hapsay nga dagan sa trapiko.
Matod ni Borja, ang mga tag-iya sa mga bakanteng lote mobarug aron makakuha og abang gikan sa ilang walay pulos nga yuta, samtang ang siyudad makamugna usab og dugang kita gikan sa parking fees nga magamit sa pagpundo sa nagkalain-laing programa ug proyekto.
Usa sa mga dapit nga gikonsiderar sa kagamhanan sa dakbayan mao ang dakong bakanteng lote sa gitawag kaniadto nga terminal sa “Bohol Land”. Nagpadayon ang negosasyon tali sa kagamhanan sa dakbayan ug sa tag-iya sa maong propyedad apan nahunong ang panaghisgot, butyag ni Borja.
Pipila sa mga karsada nga una nang gikonsiderar nga gideklarar nga designated pay parking streets mao ang Lesage Street ilabina sa tuo nga bahin sugod sa CPG Avenue paingon sa Gallares Street; ang tuo nga bahin sa H. Grupo Street gikan sa eskina sa Gallares Street hangtod sa CPG Avenue; ang tuo nga bahin sa eskina sa Jacinto Street paingon sa Marapao Street; ang wala nga bahin sa M.H. Del Pila Street gikan sa eskina sa Remolador Street ug tabok sa CPG Avenue; ug ang tuo nga bahin sa Ingles Street gikan sa eskina sa Jacinto Street paingon sa M. Parras Street.
Gitan-aw usab ang pagkakabig ngadto sa pay parking area sa wala nga bahin sa J.S. Torralba Street gikan sa eskina sa CPG Avenue paingon sa Marapao Street hangtod sa M. Parras Street; ang tuo nga bahin sa M. Parras Street gikan sa eskina sa B. Inting Street paingon sa J.A. Clarin Street; ang tuo nga bahin sa M.H. Del Pilar Street paingon sa B. Inting Street; wala nga bahin sa B. Inting Street gikan sa eskina sa M. Parras Street paingon sa Jacinto Street; ang tuo nga bahin sugod sa eskina sa Jacinto Street paingon sa CPG Avenue, tuo nga bahin sa Belderol Street gikan sa eskina sa Lamdagan Street hangtod sa Pamaong street; ang tuo nga bahin sa Lamdagan Street gikan sa San Jose Street paingon sa Belderol Street; tuo nga bahin sa Tabaco Street gikan sa intersection sa Maria Clara Street hangtod sa Belderol Street; tuo nga bahin sa Visarra Street gikan sa M. Parras Street ngadto sa CPG Avenue; tuo nga kilid sa Visarra Street sugod sa M. Parras Street paingon sa CPG Avenue, tuo nga kilid sa Lamdagan Street gikan sa San Jose Street paingon sa Belderold Street; tuo nga bahin sa Tabaco Street paingon sa Pamaong Street; Lamdagan St. hangtod sa San Jose St., ug Belderol Street gikan sa CPG Avenue hangtod sa Graham Avenue.
Kauban sa mga personahe sa City Traffic Management Office (CTMO) ug City Economic Enterprise Office, si Borja nipahigayon ug ocular inspection sa maong mga dalan, lakip na ang palibot sa nagpadayong konstruksyon sa Cogon Public Market diin ang mga parking area karon gitumbok ilabi na sa merkado fish section sa may Belderol Street ug Lamdagan Street.
Giangkon ni Borja nga hangtod karon wala pa mapatuman ang pay parking ordinance sa dakbayan partikular na sa mga giila nga pay parking streets tungod sa kakuwang sa implementing guidelines ug collection system ilabina sa sugyot ni incumbent City Mayor Jane Yap nga ang tanang cash transactions ug ang mga pagbayad mahimong digital. (RTB)
