SUGDAN na sa mga otoridad ang pagdili sa pagsulod sa mga public utility vehicles (PUV) ngadto sa accident-prone nga Mansasa-Dampas Road human ang usa ka pampasaherong jeepney mi-overflow sa downhill road ug hapit mahulog sa pangpang ug paingon sa Tagbilaran City Bay sa nakalabay nga semana.
Si Barangay Mansasa Kapitan Arvin Visarra niingon nga ang maong karsada gidili sa mga PUV apil na ang mga jeepney base sa ordinansa nga gipasar sa Konseho sa dakbayan sa Tagbilaran apan ang pagdili wala mapatuman.
Dugang pa niya nga pipila ka mga public utility vehicles lakip na ang mga jeepney ang moagi sa karsada aron mopasakay og mga pasahero.
“Kahibaw man unta sila na dili agi-anan pero kaning uban basta way magbantay mo lusot gihapon,” dugang niya.
Matod ni Visarra, ang hepe sa City Traffic Management Office nga si Tony Samante nagsugod na sa pag-andam sa bag-ong signage nga magpasabot sa pagdili sa pagsulod sa mga PUV ngadto sa ubos nga dalan.
Si Visarra nidugang nga mopasar usab sila og ordinansa sa barangay aron suportahan ang lakang sa dakbayan nga nagdili sa pagsulod sa mga PUV. (RTB)
