ANG mga local government units (LGUs) kinahanglang mag-require sa mga business establishment nga magbutang ug closed-circuit television (CCTV) cameras aron makatabang sa pagpugong sa mga krimen, matod ni Bohol Police Provincial Office (BPPO) chief Col. Lorenzo Batuan.
Si Col. Batuan nihimo og apela nga i-require ang tanang business operators nga magbutang og CCTV cameras isip usa sa mga kinahanglanon sa paghatag o pag-renew sa ilang business permit atol sa Provincial Peace and Order Council (PPOC) meeting nga gipangunahan ni Gov. Aris Aumentado sa Kapitolyo karong bag-o.
Giangkon sa kadagkoan sa Bohol PNP nga dili tanang binuhatan sa kriminalidad ang ma-monitor tungod sa limitadong puwersa sa kapolisan ug dili tanang enforcement unit ang mahimong ipakatap alang sa pagmonitor sa krimen tungod kay adunay ubang mga gimbuhaton nga nagkinahanglan usab og patas nga pagtagad.
Matod ni Col. Batuan, ang mga CCTV nga gitaod sa mga estratehikong lugar makapauswag sa seguridad, makatabang sa pagsiguro sa kaluwasan sa publiko ug sa pagsulbad sa mga krimen ingon man sa pag-ila ug pagdakop sa mga kriminal.
Ang CCTV nagsilbi usab nga pagpugong batok sa kriminalidad, dugang sa hepe sa pulisya.
Gibutyag ni Col. Batuan nga iya nang gimandoan ang mga chief of police sa 48 ka mga LGUs sa probinsya nga i-relay ang iyang hangyo nga iapil sa mga rekisitos sa pag-isyu og business permit ang pagbutang og CCTV system sa mga business establishments.
Ang pag-apelar sa kadagkoan sa kapolisan sa Bohol ngadto sa mga LGUs nagpalanog sa panawagan sa Department of Interior and Local Government (DILG) alang sa mga legislative bodies sa LGUs sa paghimo og mga ordinansa nga “no CCTV, no business permit” aron makatabang sa pagpugong sa mga krimen.
Usa ka memorandum sa DILG nagpakita nga ang mga establisemento sama sa financial firms, banko, pawnshops, shopping malls, supermarkets, wet markets ug medical facilities sama sa ospital, clinics ug laboratories kinahanglang kinahanglang magbutang ug CCTV system isip pre-condition sa pag-isyu sa permiso sa negosyo.
Ang DILG memorandum midugang nga ang ubang mga lugar nga makadani og daghang tawo kinahanglan usab nga adunay mga CCTV camera. (RTB)
