USA ka gidudahang salin sa New People’s Army (NPA) ang napatay atol sa engkwentro sa mga pwersa sa militar sa Barangay Liboron, Catigbian sayo sa buntag niadtong Enero 16, 2024.
Sa press statement nga gipagawas sa Visayas Command sa Armed Forces of the Philippines (AFP) giila ang namatay nga usa ka Julieto Rizalso Alban alyas “Ka Billy”, usa ka giingong salin sa nabungkag nga Bohol Party Committee (BPC), Komiteng Rehiyon – Negros, Cebu , Bohol ug Siquijor (KR-NCBS).
Ang hepe sa Catigbian Police Station nga si Capt. Edelberto Timagos nibutyag nga ang tropa sa 47th Infantry Battalion, uban ang mga elemento sa Bohol Provincial Mobile Force Company ug Bohol Intelligence Unit nagpahigayon og joint operation aron pagsilbi sa warrant of arrest batok kang Billy.
Apan, samtang padulong ang hiniusang grupo sa gikatahong hideout sa rebelde mga alas 4:00 sa kaadlawon, ilang nasugatan si Ka Billy nga nagmaneho sa motorsiklo sa national highway sa Barangay Liboron, Catigbian.
Diha-diha dayon nahitabo ang pinusilay nga miresulta sa kamatayon niini.
Narekober sa pwersa sa gobyerno ang usa ka 45-kalibre nga armas, granada, mga personal nga butang sa rebelde sa usa ka bag nga adunay mga subersibong dokumento.
Si Alban adunay pending nga warrant of arrest sa kasong murder, napulo (10) ka ihap sa attempted murder ug pito (7) ka ihap sa attempted homicide. (RTB)
