NIPAGAWAS ang City Engineer and Building Official sa stoppage order nga temporaryong suspensuhon ang civil works sa Cultural Hub project sa Banat-i Hill sa Barangay Bool sa Tagbilaran City.
Ang stoppage order kinahanglang ihatag ni Engr. Teodoro Estoque human gihimo ang ocular inspection nga mikompirmar sa mga taho nga ang mga debris ug mga bato naligid sa kilid sa bungtod gikan sa nagpadayon nga pagpangubkob sa dapit alang sa proyekto.
Matod ni Engr. Estoque, kinahanglan nga ipagawas ang mando sa pagpahunong aron ang kontraktor sa proyekto, ang JA Achacoso Enterprises and General Services, magpunting sa mga paningkamot sa pagsulbad sa hulga sa kaluwasan sa publiko tungod kay ang mga kinubkob nga materyales naobserbahan nga nakalapas sa gibutang nga mga babag sa kilid sa bungtod.
Kahinumdoman nga ang mga sikbit nga mga residente nipaabot sa ilang mga kabalaka kalabot sa peligro sa pagdahili sa yuta ug kalit nga pagbaha nga dala sa pagpangubkob tungod sa kusog nga ulan nga nasinati sa miaging mga semana.
Si Engr. Estoque midugang nga basta dili makatuman ang kontraktor sa standard of safety nga gikinahanglan sa project site, dili tangtangon ang stoppage order.
Ang City Engineer and Building Official nihimo sa ocular inspection human gipalanog sa mga opisyal sa Barangay Bool ang alarma kalabot sa kabalaka sa mga residente sa kilid sa bungtod sa mga kapeligrohan nga dulot sa proyekto nga sa ngadto-ngadto nadala sa atensyon sa Sangguniang Panlungsod (SP) nga nagpahigayon og hearing pinaagi sa mga komite niini sa kinaiyahan, kaluwasan sa publiko ug turismo. (RTB)
