GIBUTYAG ni Patrick Domagoso, kamaguwangang anak ni Manila City Mayor Francisco “Isko Moreno” Domagoso nga magpadayon ang ilang pagtabang alang niadtong mga nabiktima sa bagyong Odette ilabi na sa mga nagub-an sa panimalay.
Mao kini ang iyang tubag sa dihang gipangutana sa media.
Kahinumduman nga ikaduhang higayon nahidangat sa Bohol ang iyang inahan nga si Dynee Domagoso arun sa pagduso sa mga hinabang sa mga kalungsoran.
Kauban ni Patrick dinhi nga niari sa Bohol mao sila Aksyon Demokratiko Vice Presidential bet Doc Willie Ong, senatoriable Dr. Carl Balita ug si kanhi CDA Administrator Benjie Oliva nga apil usab sa campaign team ni Mayor Isko.
Dugang pa ni Doc Willie Ong, nga dili niya igsapayan ang hugaw nga pamolitika sa nasud sanglit usa man siya ka doctor nga naanad nga motrabaho sa hilom.
Gipang-endorso usab sa mga national candidates ang mga kandidatong local dinhi sa Bohol nga naglakip nila Atty. Jamie Aumentado Villamor kinsa molansar pagka-bokal sa Segundo Distrito.
Kauban ni Atty. Jamie sa Aksyon Demokratiko-Bohol si San Isidro Mayor Diosdado “Dadz” Gementiza Jr. ug Albur Vice Mayoralty bet Engr. Amon Rey Loquere.
Suportado usab nila ang TODO BigMac sa Dakbayan sa Tagbilaran nga gipangunahan ni Bise Mayor Jose Antonio “Toto” Veloso ug City Councilor Atty. Dodong Gonzaga ug uban pa.
Apil sa lineup sa TODO BigMac si City Councilor Jonas Cacho, kinsa maoy kasamtangang PCL-Bohol Exec. Vice President.
Kahinumduman nga sa Dakbayan sa Manila, ang bise mayor ni Mayor Isko nga si Honey Lacuna-Pangan nga usa usab ka doctor maoy ilang giendorso pagka mayor.
Si Lacuna-Pangan ang anak sa “political mentor” ni Isko nga si kanhi bise mayor Danny Lacuna.
Ang runningmate ni Vice Mayor Honey Lacuna-Pangan mao si Manila 3rd district Rep. Yul Servo.
Si Servo mao si John Marvin Nieto sa tinuod nga kinabuhi. (Kahlil Lester O. Camba)
