NIHATAG og pagyukbo ang labing labaw nga bokal sa Bohol sa ika-65th anniversary sa kamatayon ni kanhi Presidente Ramon Magsaysay kaniadtong Huwebes, Marso 17, 2022.
Sumala pa ni Dr. Dionisio Victor A. Balite, Ph.D nga angay panaminan sa mga politiko ang maayong liderato ni Magsaysay nga nailhan tungod sa limpiyo nga pang-gobiyerno ug walay bahid sa kurapsyon.
Matud ni Balite nga isip nangalagad sa katawhan kinahanglang magbilin sa maayong legasiya ngadto sa katawhan.
Gipasabot sa bokal nga makiangayon nga hatagan og mga programa ang mga tawo sanglit mao kini ang obligasyon sa mga opisyal.
Dugang ni Balite nga usa si Magsaysay sa mga ehemplo alang sa tawo nga tinud-anay nga nangalagad.
Base sa kasaysayan, si Magsaysay nibayahe paingon sa Manila gikan sa Cebu niadtong Marso 17, 1957 ug ang eroplano nga iyang gisakyan nahagsa sa Mt. Manunggal sa Lungsod sa Balamban sakop sa lalawigan sa Sugbu. (RTB)
