GIPAHIBAWO sa Bureau of Fisheries and Aquatic Resources (BFAR) nga ang kadagatan sa lungsod sa Dauis ug syudad sa Tagbilaran ang positibo pa gihapon sa red tide toxin, busa pahimangno sa ahensiya sa publiko nga ang tanang klasi sa kinhason sa maong dapit makalanag o dili luwas kan-on.
Hinuon, ang mga isda, nokos, hipon, ug mga kasag gikan sa nahisgutang baybayon luwas ra kan-on basta hugasan sa maayo ingon man ang ilang mga internal organs sama sa hasang ug mga tinae kuhaon sa dili pa luto-on, sigon sa BFAR.
Ang Dauis ug Tagbilaran Bay ang usa lang sa 5 ka mga lugar sa tibook nasud nga positibo sa paralytic shellfish poison hangtud karon, base sa shellfish bulletin No. 5 nga giluwatan sa BFAR kaniadtong Huwebes, Marso 17, 2022.
Lakip niini mao ang kadagatan sa Milagros, Masbate; Dumanquillas Bay sa Zamboanga del Sur; Litalit Bay, San Benito sa Surigao del Norte; ug ang Lianga Bay sa Surigao del Sur nga pabiling positibo sa Paralytic Shellfish Poison (PSP) kon toxic red tide nga lapas sa regulatory limit.
Kahinumduman nga Mayo 2018, sa dihang unang gipahibawo sa BFAR nga taas kaayu ang red tide toxins sa maong mga dapit sa Bohol, ug nagpabilin pa kini hangtud karon.
Ikalima na kini nga shellfish bulletin karong tuiga diin una niini kaniadtong Enero 20, sunod sa Pebrero 7, Pebrero 20, ug Marso 2 niining tuiga.
Nagpagawas sa shellfish bulletin ang BFAR pinaagi sa hepe nga si national director (Ret) Commodore Eduardo B. Gongona. (RTB)
