DAGHANG DESPERADO ug desperada na ilabina nagkaduol ang Eleksyon 2022.
Makalingaw nga makapungot ang ubang istorya. Mao kini ang nag-una sa labing “trending” karon.
Anaay istorya nga anaay daghang nibali, apan ang pikas partido niingon usab nga anaay nibali gikan sa pikas nga nitapo nila.
Ang uban usab nga kandidato naghimo-himo og mga survey, survey nga sila ang nigawas nga mudaug.
Siyempre, ang uban usab sa mga dumadapig, nakiglalis sa uban. Nidepensa sa isig ka isyu sa ilang mga gilabanan.
Anaay nikatag usab nga istorya nga ang uban nagkasaduay na ilabina kadtong mga sugarol.
Nikatap usab ang istorya nga naay pulitiko nga nibahad ng daan nga kun anaay musaway niya, i-kiha kuno.
Apan mas nitiyabaw ang istorya nga anaay daghan ng mubali sa ilang labanan karong 2022 kay nasuko sa pihig-pihig nga serbisyo-publiko.
Pero mas angay hatagan og seryosong pagtagad ang mga pulitiko nga maldito o maldita apan mga talawan.
Gamiton ang kahuyang sa ilang mga kaatbang o dumadapig sa ilang mga kaatbang aron ipalabaw ang ilang dautang mga intensyon.
Usa niana ang pagpanghudlat ilabina ang pagduot aron mu-hural sa ilang mga kagustuhan.
Ang mas ikaulaw, kanang manghinaot nga mamatay ang ilang kaatbang aron hanoy ang ilang kadaugan.
Ambot na lang ng mga klaseha sa pulitiko. Talawan diay kun mauhon kana.
Makaluluoy ang katawhan kun sila buligan pa. Laing pag-antos na usab ang masinati kun mulampos ang ilang mga hugaw nga tumong ug tinguha. Palayo intawon!
Pili-a ang mga lider nga isog og baruganan ug mga buotan ilabina magtan-aw sa usa ka timbang nga pagpangalagad.
Hinlo-i ang opisina de gobyerno diha sa inyong lungsod kun nagtan-aw kamo sa maayo ug hayag nga kaugmaon.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Mudawat lamang og seryoso ug dili binuang. Mag-amping kita, mga Bol-anon!
