TAGBILARAN CITY, Bohol (PIA) –Hinay-hinay na nga mapasayun ug mawala na ang paninapi sa mga mangtas nga nagnegosyo sa kalisud sa mga byahedor, kini kon mapatuman ang gisugyot sa Regional Development Council nga aghaton ang tanang local nga mga kagamhanan nga may mga pantalan sa nga magpagawas og ordinansa aron pugson ang mga barko sa pagsagop sa e-ticketing ug cashless nga transaksyones.
Kini nga sugyot usa sa mga resolusyon nga iduso ug hisgutan sa atul sa tigum sa Regional Development Council (RDC) nga dinhi himoon sa Bohol, Disyembre 7, 2023.
Ang RDC nga gipangulohan ni Gob Erico Aristotle Amumentado nagtumong nga mas mapasayon pa ang pagsulod sa mga katawhan sa mga isal nga lalawigan sa Central Visayas subasy sa Ease of Doing Business and Efficient Government Service Delivery Act of 2018.
Buot nato nga ipaduso usab ang financial inclusion, ilabi na gyud ang kinatibuk-ang pagpatuman sa National Strategy for Financial Inclusion (NSFI) sa 2023-2028, matud sa draft resolution nga possible nga ipasupot atul sa tigum sa Bohol.
Kahinumduman nga kaniadto pa nga gihimoan og aksyon sa RDC sa ilang full council meeting ang pagpa-uso sa electronic ticketing (e-ticketing) u gang paghiusa sa mga terminal fees ngadto na sa mga bayranan sa ticket sa barko aron dili na mahalsol og sige nga pila ang mga pasahero.
Kini nahisulod na sa RDC Resolution No. 47 (s. 2018) ug sa RDC Resolution No. 52 (s. 2017).
Sa laing bahin, ang Economic Development Committee (EDC) sa RDC nagpadayag na usab sa ilang suporta sa e-ticketing ug pagpahiusa sa terminal fees diha nga gihulma niini ang EDC Port Services Technical Working Group nga nagtutok sa pagpatuman sa e-ticketing ug pag-integrate sa terminal fees ngadto sa mga tickets.
Gawas pa sa RDC resolutions, ang Philippine Ports Authority (PPA) usab mipagawas og Administrative Order 12 (s. 2019), alang sa Policy sa “Centralized Ticketing System (CTS)” alang sa mas sayon nga pamaagi sa pagbyahe.
Niini, ang EDC mipasa nag Resolution No. 11 (s. 2019) niadtong 2019, nga naghangyo sa Department of Transportation (DOTr) nga iapil na ang Central Visayas sa pagpatuman sa One Ticketing System, apan wala pa kini ikapatuman sa mga pantalan sa Central Visayas.
Dala sa nagtipun-og pa ihapon nga mga suliran sa tag-as nga pila, pagkalangay, naghan-ok nga pasahero nga nagpalisud na hinuon paghimo sa mga maayong lakang sa pagpadali sa mga serbisyo, giduso ni Private Sector Representative Edward C. Du nga ang Dumaguete City nagpasa nag ordinansa nga nagmandu sa mga kompanya sa barko sa pagsagop sa e-ticketing, ug kini kinahanglang mapatuman na sa sunod tuig.
Gisugyot na usab nga himoon kining pag-aghat sa tanang LGU sa Central Visayas. (PIABohol)
