KARON nga nagkaduol ang Adlaw sa Manunubos (Pasko) sa kalibutan nga mao si Hesukristo, hinaot mas puy-an sa katilingbang Kristohanon ang mga maayong binuhatan.
Ang Pasko nagpahinumdom kanato sa pagpasaylo. Ug diha sa pagpasaylo ug pagpangayo og pasaylo, mao ang pagbag-o sa kaugalingon.
Naapektuhan ang mga Pinoy sa panagbuwag sa usa sa pinakamalampuson nga loveteam sa Philippine showbiz – ang KathNiel – nga mao si Kathryn Bernardo ug Daniel Padilla.
Gikan sa mga batan-on, sa mga hamtong o ordinaryong katawhan hangtud sa mga politiko, alagad sa Simbahan, kaubang artista ug nagkadaiyang katawhan, niapil sa ilang istorya.
Ana-a ang istorya nga matud pa, anaay “bitin” o “nitraydor” o “nangilog” sa lalaki, o ang lalaki maoy nangita og lain.
Walay nakahibawo sa kon unsa ang tinuod – sila ra gayud ang mga nalambigit, kay ana-a may lain-laing bersyon sa istorya ang matag usa.
Sa bersyon sa mga netizens, ilang gibasol ang “third party” kuno nga mao si Andrea Brillantes, nga nikisi-kisi nga wala siyay sala.
Ang nahitabo sa KathNiel nagpahinumdom kanato ilabina sa mga anaay ka-relasyon, nga imperpekto gayud ang tawo ug ang kalibutan.
Ug tungod kay dili man perpekto, anaay masayop, masipyat o makahimo og mga sala.
Ang pangutana, ikaw nga nisaway sa ni bisan kinsa nga nalambigit, wala ka ba’y mga sayop nga desisyon sa imong kinabuhi nga nahimo kaniadto o karon?
Kini nagpahinumdom, nga sa dili pa kita mosaway sa uban, ato unang panaminan ang atong kaugalingon kon dili ba kita sama niya o nila. Kon dili, mas maayo. Himo og lakang nga makapaambit ka sa imong mga maayong tambag aron matul-id ang kasaypanan sa imong gisaway.
Gubot na kaayo ang kalibutan karon. Ug ang kinabuhi sa mga artista, sikat man tuod, dili kalikay sa mga isyu ug kontrobersiya. Apan sama nato, tawo usab sila – malipay, masakitan, makabuhat og sakto, ug masayop.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
