IBUTANG sa umaabot Disyembre 20, 2023 sa white code alert ang tanang 10 ka provincial hospitals sa Bohol isip pagpangandam lima ka adlaw sa dili pa ang Pasko ug pagsugat sa tuig 2024.
Gibutyag ni Provincial Health Office (PHO) Dr. Reymoses Cabagnot nga ubos sa maong code white alert, ang tanang hospital staff ilabi na kadtong nabutang sa mga emergency rooms, mga surgeons ug kadtong adunay specialization sa trauma ug injuries, ibutang sa ‘on standby’.
Samtang ang mga Rural Health Units (RHU) sa nagkalain-laing lungsod gimanduan nga magpabiling alerto diin ang mga pasilidadis dinhi kinahanglang andam ug adunay kawani nga naka-standby.
Matud pa ni Cabagnot nga gimanduan ang mga kawani sa RHUs nga magpabiling ‘on call’ sa maong mga adlaw.
Gidugang usab niini nga ang preparasyon sa pasilidadis sa panglawas krusyal matag Pasko ug Bag-ong tuig diin adunay mapaabot nga mga firecracker-related injuries ug bisan ang mga pasyente nga maigo sa saag nga bala diin nahinabo gayud sa mga niaging mga tuig.
Sa pagkakaron nga 14-ka adlaw na sa dili pa ang Pasko, wala pa’y natala sa lalawigan nga gidala sa mga tambalanan tungod sa firecracker accidents. (RTB)
