ANG tumang pagpaubos maoy sentro sa mensahe sa ikaduhang labing-labaw nga opisyal sa Bohol atol sa pagsaulog sa mga Bol-anon niining kapaskuhan.
Lakip sa gihatagan og importansiya ni bise-gobernador Dionisio Victor Balite mao ang kabatan-onan nga malayo sa sakit ug magbinootan.
Matod ni Balite nga wala siyay mahatag nga bililhong gasa alang sa tanang mga katawhan, gawas sa pag-ampo sa Ginoo nga hatagan og kabaskog sa panglawas ang tanan ug malayo sa bisan unsang balatian.
Midugang ang bise-gobernador nga unta ang kabataan manggiluy-on ug dili mahimong problema sa ilang mga ginikanan ug sa katilingban.
Nagkanayon si VG Balite nga kon ang kabataan adunay pagtahod sa ilang mga ginikanan ug kaigsoonan, walay krimen nga mahitabo ug dili usab kini makahimo og salaod.
Gipasabot ni Balite nga pinaagi sa pagpaubos susama sa gihimo sa Batang Jesus nga nagpakatawo sa pasungan sa Baka, nabuntog niini ang dautang mga plano sa Yawa ug kinahanglan usab nga ang tanan motuo sa pag-ampo. (RTB)
