GIBAHA ang St. Joseph the Worker Shrine Parish sa Tagbilaran City kaniadtong Nobyimbre 29,2023 human nasinati ang kusog nga uwan sa syudad ug pipila ka bahin sa lalawigan.
Nakita sa video nga gi-post sa social media ang pag-awas sa tubig gikan sa ibabaw nga bahin sa maong Cathedral diin gituohan sa mga parokyano nga naigo sa kilat ang atup sa simbahan hinungdan nga nabuslot ug nisud ang tubig nga miresulta sa pagbaha sa simbahan.
Apan sumala pa sa tigdumala sa Simbahan nga wala kini maigo sa kilat kon dili hugaw lang ang gutter nga hinungdan sa pag-awas sa kusog nga tubig.
Dungan niini, usa hinoon ka punuan sa lubi ang gikunis-kunis sa kilat sa Brgy. Dampas ning syudad sa Tagbilaran sa maong adlaw.
Kahinumduman nga ang PAGASA DOST-Visayas niluwat og thunderstorm advisory sa Bohol ug pipila ka bahin sa Sugbo niadtong Huwebes, Nobyembre 29, 2023. (RTB)
