NAGPLANO ang hepe sa Bohol Provincial Police Office (BPPO) nga si Col. Lorenzo Batuan nga mopatuman og reward system aron madasig ang dugang tipsters sa paghatag og impormasyon sa mga awtoridad pagtaho kanila kabahin sa kalihukan sa illegal nga drugas gikan sa silingang mga lalawigan.
Si Batuan niingon nga ang aktibong partisipasyon sa publiko motubag sa kakuwang sa mga tawo sa BPPO sa pagmonitor sa tibuok baybayon sa probinsiya batok sa mga tigpayuhot og shabu sa probinsiya.
Ang hepe sa kapolisan nga maoy labing unang Boholano nga mipuli isip top post sa PNP-Bohol sulod sa kapin sa dekada nisubli nga ang shabu wala gigama sa isla apan gipalusot gikan sa silingang mga lalawigan sama sa Sugbo.
Matod ni Batuan, iya nang gisugyot ang inisyatiba ngadto kang Gobernador Aris Aumentado diin ang maong sugyot gidawat og maayo sa gobernador kinsa nipasalig og suporta ug pagpundo sa programa.
Hinuon, namatikdan ni Batuan nga wala pa nila ma-finalize ang kantidad nga ihatag sa mga mahimong malampuson nga motultol sa pagkasakmit sa ilegal nga drugas nga gipadala gikan sa ubang probinsya.
Dugang pa sa hepe sa kapulisan nga ang BPPO nagtutok sa duha ka bahin sa kampanya niini batok sa ilegal nga drugas, nga mao ang pagpakunhod sa suplay ug panginahanglan.
Gihingusgan usab sa BPPO ang ilang information campaign batok sa ilegal nga drugas ug ang intervention program niini alang sa mga drug users. (RTB)
