ANG krimenalidad kasagaran makigkaluha sa kauswagan ug kalambuan sa usa ka lugar.
Ang korapsyon lakip na ang kawat nga ginagmay, ana-a gayud ang presensya bisan sa pag-abante sa lungsod, probinsya o sa tibuok nasud.
Dili na kini ikatingala kay ang kalibutan giharian man sa dautan, ni Satanas. Ug daghan ang nagpaulipon kaniya.
Diha sa pag-abante sa usa ka lungsod, dili malikayan nga anaay mangurakot kay daghan man ang makurakot. Daghang makawkaw o makawat sa kaban sa katawhan.
Ang krimenalidad ilabina ang kawat ug tulis, motumaw tungod kay daghang walay trabaho o gibiyaan ba kaha sa gobyerno — wala nakit-i ang problema o nagpakabuta-bungol sa maong suliran.
Ana-a usab ang mga nihawa sa sabakan sa gobyerno o nirebelde tungod kay wala kaangay sa namunuan. Ug bisan kinsa pa ang molingkod, dili mawala ang maong grupo.
Sa liderato ni Gobernador Aris Aumentado, iyang gihinay-hinayan og awhag ang mga ana-a sa walhong kalihukan nga mobalik na sa normal nga kinabuhi, bitbit ang maayong mga saad sama sa panginabuhian, labaw niana ang kasiguruhan nga dili kanunay mabutang sa alanganin ang ilang kinabuhi.
Dili imposible ang usa ka patas ug malinawonnga katilingban, kon magkatakdo lang ang baruganan sa mga namunuan ug sa mga dayag nga agalon — ang katawhan.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
