TAGBILARAN CITY, Bohol (PIA) –Alang sa buwan sa Septembre 2023 nga mitala sa 6.4 nga inflation rate, may arang-arang kini, kon itandi sa Septembre 2022 kanus-a nasinati sa Bohol ang 8.3 nga inflation rate.
Ang Inflation rate, giila nga ang kinatibuk-ang pagsaka sa mga presyo sa lanat sa panahon, ug kini kasagaran halapad nga sukdanan nga gilantaw na nga mabati sa kadaghanan nga moepekto usab sa pagmahal sa paliton sa us aka lugar.
Didto sa Data Dissemination nga gihimo sa Philippine Sattistics Authority, gipasabut ni Venus Gloria, statistical analyst sa PSA Bohol nga niadtong Sept 2022, 8.3 ang natala nga inflation rate, samtang sa Agosto 2023, napakunhod kini ngadto sa 6.0.
Sa binuwan nga dagan sa inflation na nasinati sa Bohol, matud ni Gloria, labing taas nga inflation rate nasinati niadtong Enero 2023 nga miabut sa 10.3, hangtud nga milurang kini apan taas pa gihapon sa Pebrero sa 9.4.
Pagka Marso, niubos pa kini ngadto sa 7.8 ug mius-os pa gani sa Abril 2023 ngadto sa 7.4.
Pagka Mayo, ang inflation rate sa Bohol anaa na sa 7.1 ug natala sa Hunyo ang inflation rate nga 5.9.
Sa Hulyo, natala ug nasinati sa Bohol ang labing ubos nga inflation rate sa 4.4 sa wala pa kini mosulbong og balik ngadto sa 6.0 sa Agosto ug 6.4 sa Septembre.
Sa kinatibuk-ang lanat gikan sa Enero nagdto sa Septembre, ang kausaban sa presyo sa nag-unang palaliton (Consumer Price Index) natala sa 7.1.
Dayag sa PSA pinaagi ni Gloria nga ang labing daku nga pag-usab sa presyo sa paliton nga nag-bitad sa Inflation mao ang presyo sa pagkaon sama sa bugas, isda, itlog ug mga produkto gikan sa gatas ug ilimnon nga dili makahubog (non alcoholic beverages).
Pananglitan, sa Agosto, ang presyo sa bugas nga anaa sa 11.9 ang inflation rate, misulbong pa ngadto sa 17.5 percent.
Ang presyo sa isda sa Agosto, mitala sa 3.5 inflation rate nga mingsaka sa 4.7 sa Septembre 2022.
Ang gatas, itlog ug mga produkto gikan niini, gikan sa 7.7, misaka sa 8.5, taho sa PSA.
Gani, matud sa PSA, ang inflation sa pagkaon sa Septembre, miabut sa 9.9, gikan sa 9.1 sa Agosto ug 8.3 sa Septembre sa miaging tuig. (PIABohol)
