NAGMALAMPUSON ang unang pagpahigayon sa Sang-at Festival sa Valencia nga naatol usab sa 154th Founding Anniversary sa lungsod.
Nahimo kini nga “show of force” human nahimong pinasidunggang dinapit si Sen. Ronald “Bato” Dela Rosa lakip na ang duha ka mga anak ni Sen. Francis “Tol” Tolentino kon diin usa ka konsehal sa Dakbayan sa Tagaytay ang usa nila.
Ang duha ka mga senador puros nibubo sa minilyong mga ayuda ug proyekto sa Bohol pinaagi sa AICS, TUPAD ug uban pa.
Nanguna si kanhi bise gobernador Manlalaban Dionisio D. Balite, Bise Gob. Dionisio Victor A. Balite ug Valencia Mayor Dionisio Neil A. Balite sa pakig-abi abi sa mga bisita nga naglakip nila Gob. Aris Aumentado, kanhi DoTR Usec ug karon Exec. Asst. Art Evangelista, DSWD region 7 head Shalaine Marie Lucero, DA 7 Regional Technical Director for Operations Joel Elumba, TESDA-Bohol head Engr. Wenifredo Salas, DILG Provincial Director Jerome Gonzales, BPLIC head Vida Aparece, ug uban pa.
Gisaysay ni Mayor Balite nga ang Valencia nag-gikan sa karaang pangalan niini nga Panang-atan nga dunay “root word” nga “Sang-at” nga nagpasabot ibutang sa “elevated place”.
Mao kini ang nahimo nga inspirasyon sa mga lideres sa pagpahigayon sa Sang-at Festival.
Dugang pa niya, ang Lungsod sa Valencia ug Dakbayan sa Valencia didto sa Bukidnon nisulod sa “sisterhood agreement”. Mas mapalig-on pa pinaagi niini ang binayloay sa kultura ug uban pang kaayohan tali sa duha ka dapit.
Nitambong usab ang mga kaalyado ni Sen. “Bato” Dela Rosa dinhi sa Bohol nga sila SP Chairman on ICT Committee nga si Board Member Greg Jala ug Loboc councilor Efren Mandin.
Ang grupo nila Sen. Bato niduyog usab sa kasaulogan sa adlawng natawhan ni Candijay Mayor Thamar Olaivar. (Kahlil Lester O. Camba)
