TAGBILARAN CITY, Bohol (PIA) – Na pruwebahan na usab ang usa ka paborito nga bansay sa mga armadong rebelde nga buot makaipsot sa pokot nga ilatag sa mga kasundalohan sa higayon nga may mahitabo nga encounter.
Kini mao ang paglubong sa mga armas aron luwas kining makasibat nga dili kadudahan nga armado, ug dali nga makapa-aron ingnon nga sibilyan.
Wala hinuon maghimpos, kay human sa engkwentro sa kasundalohan ug mga armadong terorista nga rebelde didto sa Campagao, Bilar, nakuha sa mga kasundalohan ang kasayuran nga may mga armas nga gipanglubong didto sa Purok 4, Barangay Cabacnitan Batuan, niadtong Oktubre 3, 2023.
Sa pagsuta pa sa mga kasundalohan, nakubkoban sa gitumbok nga lugar ang usa ka Carbine Rifle nga may duha ka magazine ug 45 ka buhing bala.
Nakuha usab didto ang usa ka shotgun, ug usa ka bandolier sa mga bala ug mga gamit sa gubat, segun pa sa taho ni Colonel Magno Mapalad didto sa Provincial Peace and Order Council nga nagkatigum Oktubre 18 didto sa Capitol.
SI Col Mapalad, kinsa maoy commanding officer sa 302nd Brigade nga na-assign sa Bohol, mibutyag usab sa iyang taho nga gawas sa pagkamatay sa unom ka mga armadong teroristang rebelde, na-ilog usab sa tropa sa kagamhanan ang 7 ka high powered fire-arms niadtong engkwentro sa September 7 didto sa Campagao, Bilar.
Duha niini ang gikahadlokan nga AK 47 ug lima ang M16 Armalite Rifles, mga bala, tambal, personal nga mga kagamitan ug mga dokumento nga nagpamatuod nga sila nahibiling sakop sa nabuntog na nga kalihukang walhon.
Sa laing bahin, sa katapusang mga encounters sa Bohol, gitaho usab sa 302nd IB nga pito ka rebelde ang ilang na-neutralize, usa niini didto Tabuan Antequera nga encounter ug laing usa pa ang ilang gikubkob human gilubong sa lasang human sa encounter, samtang laing usa ang nadakpan, didto human encounter sa Sevilla.
Upat usab niini ang mingsurrender na lang ug mipili sa kinabuhing malinawon.
Sa susamang tigum, gipresentar usab ngadto sa PPOC ang 61 sa 63 ka mga rebelde nga mingsurrender human nila masabti nga wala na silay angay pang ipakig-away.
Nakita usab nila, segun pa sa mga saysay sa mga mingsurender, sa ka sinsero sa Administrasyon ni Gob Erico Aristotle Aumentado sa pagpatunhay na sa kalinaw sa Bohol. (rahc/PIA-7/Bohol)
NAREKOBER. Gawas sa 7 ka high powered firearms nga nakuha didto sa gigirahan sa Campagao Bilar, nakubkoban usab sa mga kasundalohan ang usa ka carbine, shotgun ug mga bala ug magazine, samtang nakubkob usab sa mga tropa ang usa pa ka NPA nga gilubong didto sa lasang, subay sa saysay sa mga rebelde nga mingsurrender na, taho no 302nd IB Commanding Officer Colonel Magno Mapalad III, atul sa PPOC, Oktibre 18. (PIABohol).
