GIHULAGWAY sa amahan sa lalawigang Bol-anon nga ang kalag-kalag mao ang pasko sa kasakit sa mga katawhan.
Kini tungod kay sa umaabot nga Martes, Oktobre 31, magpanon ang mga pasahero paingon sa mga terminal aron manguli sa tagsatagsa nila ka mga lugar dinhi sa probinsya ug ubang bahin sa nasud.
Sumala pa ni Gov. Aris Aumentado nga kaniadto sa diyutay pa ang mga sakyanan, ning maong adlaw, luoy sud-ongon ang panag-ilogay sa lingkoranan sa mga mamauliay, kinsa daw mga umang nga naglumbaanay’g katkat sa bungbong agi sa binuksang mga bintana.
Dugang ni Aumentado nga usahay, aduna mahapla sa yuta ug maumod ang bugdong dughan sa nakapanghupaw nga kalsada.
Ang makalagot suma sa gobernador kay dihang nakasakay na, mag-ali ang mga malditong dispatser, kinsa naglingkod nang daan ug pabayron sila kay ang mao kunong lingkoranan gireserba para sa mga pasaherong gustong makalingkod.
Ingon niini kahasol ang masinati sa mga pasahero panahon sa adlaw sa mga minatay, sigon ni Aumentado.
Naobserbahan ni Aumentado nga panahon sa kalagkalag, ang mga tagtungod magdala ug pagkaon sa lubnganan sa ilang minahal ug dili lang mangaon, mag-inom usab.
“Kining maong adlaw usa ka Pasko alang sa mga Minatay, mao nga ato silang halaran og mga butang nga makapalipay sa ilang mga kalag”, sigon ni Gobernador Aumentado.
Angay hinumdoman sigon nga kining adlaw sa mga minatay o kalagkalag, dili pasko sa kalipay kon dili pasko sa kasakit ug ang Pasko sa Kalipay sa Disyembre 25 pa.
“Usbon ko, sa ngalan ni CongW. Vanbvan sa second district ug sa akong tibook pamilya ug isip inyung ubos nga amahan sa Bohol, ako miduyog kaninyong tanang mga Bol-anon sa atong paghandum sa atong mga sakop o banay nga mihalin na sa laing kalibutan, ug muhalad sa mga pag-ampo alang sa kaluwasan sa ilang mga kalag”, dugang pa ni Aumentado. (RTB)
