TUNGOD kay gianak man kitang usa ka lalaki niining kinabuhia karon, ang kasagaran natong yanong pagsabut sa tentasyon mao ang makapadani nga talan-awon sa mga babayeng seksi. Apan daghan pang mga matang o kahigayonan sa tentasyon, sama pananglit sa usa ka tricyle driver nga makakitag dagkung kantidad sa kwarta nga mahibilin sa iyang sakyanan gikan sa usa ka pasaherong mikanaog na. Og labi na gayud ang mga pulitikong mahimong mogamit sa ilang impluwensya aron makigkonsabo sa mga negosyante, kasaragan mga contractor ug bidder, aron makakikik gikan sa mga kontrata sa gobyerno.
Apan ang matang sa tentasyon nga atong gikahibalag karong panahona nga lisud sagubangon mao ang tentasyon sa presensya. Unsay buot natong ipasabut? Maoy atong gipunting dinhi ang mga tawo, lalaki man o babaye, kansang presensya lamang daw sa makatintal na kanato sa pagbati og kasuko, kasamuk sa hunahuna o ka-alibango. Kana bang, makit-an lang nimo ang usa ka tawo mosantup dayon sa imong hunahuna, “Nia na pud ning tawhana. Unsa na kaha puy isulti ini? Gamugtok lang ang dagway. Etcetera etcetera”.
Wa pa gani moabri sa baba ang tawo, nakasala na ta, kay ang iyang presensya pa lang, makapainit na sa atong balatian. Makatintal paghunahuna og negatibo. Adunay mga ingon niana nga sitwasyon ug kahigayonan. Maoy paga-ingnon nga kini tipik sa krus nga atong pas-anon sa matag-adlaw. Gawas pa niana, wa pud ta masayud og ang atong presensya pud mismo tentasyon pud alang sa ubang tawo. Apan wala kita magsangyaw sa mga ehemplo nga atong ikapakita kay kita mismo usa pa man ka tawong nakigbisug pa usab sa kaugalingong mga kahuyang o weaknesses. Pila pa kaha ka bakid ang atong angayang kan-ong humay aron ta makakab-ot sa kahingpitan sa maayong pamatasan ug buotang kinaiya?
Kining maong punto nagdala kanato sa atong hisgutanan kabahin sa responsibilidad. Matud sa mga modernong psychologists nga nagtuon sa hunahuna sa tawo, kung tugkaron gyud kuno nato ang kinauyukang bahin sa atong pagkatawo, kita gyud kuno ang responsable sa atong mga pagbati. Bisan pa kunog moingon ta sa atong hunahuna, “Nia na pud ning tawhana. Saputon gyud kog makakita nija”, kita gyud kuno gihapon ang responsable sa atong pagkasaput, og dili ang tawong atong gikasaputan.
Mahimong ato kining debatehan sa taas nga panahon. Mahimo usab nga atong iduso ang ideya nga kadtong tawhana nga maoy atong gipasanginlan nga nakasaput nato maoy stimulus o nakapukaw sa atong saput. Apan luyo sa tanang panaglalis sa nagkadaiyang ideya mahitungod niining maong suliran, anaa ang Kristohanong kamatuoran nga ang tawo maglisud gayud pagkab-ot sa kahingpitan sa maayong pamatasan ug kaaghop sa kinaiya kung walay grasya sa Dios. Sa kaulahian, kinahanglan gayud kitang magpaubos ug mosangpit sa atong Ginoong Hesu Kristo. “Lord, dili naku kaya ang pagpas-an sa inadlaw-adlawng kalisdanan nga ako ra. Tabang, Lord. Nia na pud ning tawhana, Lord o. Ikaw nay bahala niya Lord!”
