TAGBILARAN CITY, Bohol (PIA) –Sayop ang moingon nga giabrihan sa National Irrigation Administration (NIA) ang dams, hinungdan nga mingkusog ang tubig sa suba ug hinungdan sa baha.
Kini maoy gipasabut ni Engr. Avelina Putong, NIA Region VII Bohol Integrated Irrigation System Head, kinsa maoy naghatag sa briefing ngadto sa mga sakop sa Association United Development Information Officers (AUDIO) sa ilang gihimo nga Bisita Opisina didto sa Benliw Small Reservoir Irrigation System (SRIS), Oktubre 6.
Gipasabut ni Engr Putong nga sahi sa kasagaran nga mga dams nga pundohanan og tubig, ang tanan nga mga dams sa NIA dinhi sa Bohol, gidesinyo nga walay gates ug mao nga dili mahitabo nga ablihan ang wala sa design.
Ang tanan nga NIA Region 7 dams pulos may desinyo nga ungated spillways.
Subay niini, wala kini probisyon sa mga gates nga pwede buksan ug sirad-an, ug kon ang tubig nga gitapok niini, makaabut na sa kinatibuk-an niiini nga dam capacity, moawas gyud kini nga mahimo nga mapadivert kon may panginahanglan, matud niya.
Dugang niya, ang mga dams sa Bohol, kon adunay daghang tubig, ipamahin na kini sa uban nga mga dams sa integrated irrigation systems.
Ang Malinao Dam pananglitan sa Pilar, bisan pa kon iyang paawason sa Bayongan Dam, kon may kusog nga uwan sa bukid, may kahigayunan gayud nga moawas ug moadto na sa mga suba nga mopahubas sa tubig niini.
Ang Bayongan Dam usab, may agi-anan sa sobra nga tubig aron masawod usab sa Capayas Dam, ng atua didto sa Ubay.
Kini aron madaginot gyud ang tubig nga gikinahanglan sa pagpatubag sa mga basakan nga gitamnan og humay.
Taho usab sa NIA-7 nga sa mga dams sa Bohol, hangtud Oktubre 9, 2023, ang Talibon SRIS lamang ang dam nga nag-awas.
Segun sa weather forecast sa PAGASA Visayas, makabaton ang Central Visayas og mapanganuron nga kalangitan nga may katagkatag nga pag-uwan og pagpanugdog.
Kini tungod sa Low Pressure Area (LPA) nga makangin sa kasubangan nga bahin sa Mindanao.
Aduna usay light to moderate winds gikan sa amihanang kasubangan paingon sa Amihanang kasadpan ang magpasuwabi sa tibuok Kabisay-an.
Milaum ang NIA7 nga kainng nga uwan nga dala niining LPA, makatabang sa pagpapuno sa mga dams aron matigum ug magamit sa mga mag-uuma ilabi na sa nagsingabut nga El Nino. (PIABOHol)
