DAKO ang pagdayeg ug pagsaludo sa ikaduhang labing-labaw nga opisyal sa tibook Bohol sa tanang mga magtutudlo sa tibook nasud nga Pilipinhon.
Kini ang gibutyag ning pamantalaan ni Bise-gobernador Dr. Dionisio Victor A. Balite, Ph.D human sa pagsaulog sa ‘World Teachers Day’ sa nakalabay nga Oktubre 5, 2023.
Sumala pa ni Balite nga sa maong adlaw, gisaulog sa Pilipinas ang ‘World Teachers Day’ agi og pag-ila sa propesyon sa pagkamatutudlo.
Dugang sa bise-gobernador nga ang pagtudlo og pagmatuto sa mga kabataang Pinoy pinaagi sa mga titser, maghimo kanila nga responsable ug mapuslang molupyo sa nasud.
Apan sa pagkatinuod matod ni Balite nga bugtong pasyon nalang sa pagtudlo ang nagpagana sa mga titser diha sa ilang trabaho, kay bisan nalubong na sila sa utang tungod sa kagamay sa ilang suholan ilabi niadtong mga naa pa sa kinaubsang posisyon, wala silay kaluya pagbuhat niini.
Sumala pa sa bise-gobernador nga makapila na ka higayon nga adunay gianunsyong mga usbaw sa suhulan, apan gamay ra kaayo ug wa katabang sa ilang sitwasyon
Nasayran ni Balite nga sa Kamara-Baha dunay mga balaudnon nga magpasaka sa suhulan sa mga magtutudlo sa tibook nasud gikan sa kasamtangang 16K-20K nga suhulan matag buwan, himoon na kini nga 30K matag buwan.
Nakita usab ni Balite nga dili lang suholan ang problema sa mga magtutudlo kon dili matag tuig nagkadaghan ang populasyon sa tinun-an apan pipila lang ka buok ang na-rekrut nga bag-ong magtutudlo tungod sa kakuwang sa plantilla positions. (RTB)
