PANAHON sa piniliay mogawas ang dayag nga kinaiya sa ubang tawo ilabina ang pagka-plastik.
Daghang plastik nga mga politiko o mga kandidato pa lang ang mopakita gayud sa ilang klarong batasan sa pamasin nga molusot.
Anaay uban, kon dili man gani ang kadaghanan, mobuhat og mga dautang paagi aron lang modaug.
Ang kuwarta, estratehiya ug impluwensya maoy himuong armas aron molampos.
Apan kadtong mahadlukon sa Ginoo ug balaod sa tawo, tinarong nga mga lakang ang ipakita aron makita usab sa katawhan ang ilang sensiridad sa pagpapili.
Ang usa lang ka dakong babag sa kalampusan sa mga kandidatong maayo ang tumong ug tinguha, mao ang salapi ug dili patas o hugaw nga duwa sa ilang mga kaatbang.
Anaay uban kusog na managad kon magpapili na. Ayaw kana pili-a. Plastik ang maong klase sa mga kandidato.
Hinuon, ang taga-Barangay mas kaila o nakaila na man sa mga magpapili, gawas na lang kadtong bag-ong nawong o dili lumad sa maong barangay — mas maayo nga hashasan o himbisan og kadaghan una mo-desisyon.
Mayorya sa mga magpapili maayo ra kon eleksyon na. Tinuod o dili? Ikaw na ang mag-igo.
Manghinaot na lang kita nga sa mosunod nga mga Piniliay, mas daghang tarong nga mga kandidato.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
