IMPORTANTE ang pagpili og tarong nga mga kandidato nga maoy mahimong lider sa lungsod sulod sa laing tulo (3) ka tuig.
Mao kini ang gipahinumdom sa akong kauban nga kandidato pagka-Kagawad sa lungsod sa Trinidad nga si Florecer “Rese” Nuera Gonzales.
Si Noy Rese nahimong kagawad sa lungsod sulod sa upat (4) ka termino (12 ka tuig).
Beterano na gayud sa pulitika. Ug matud niya, daghan siya og nahimong mga Ordinansa sa iyang panahon.
“Crucial ang pagpili kay ang mapili maoy mualagad kanato sulod sa tulo (3) ka tuig,” matud niya sa dihang nagka-istorya mi sa niaging adlaw.
“Kay kun masipyat ang katawhan sa pagpili, mag-antos sila sulod sa 3 ka tuig,” iyang pagpasabot.
Si Noy Rese tigsunod niing akong lindog nga “Tingog sa Kabatan-onan”.
Nidayeg si Noy Rese sa akong mga opinyon kay mas nagkanindot kuno ang content niini.
Ang maong beterano sa pulitika kinsa mibalik og papili aron mahimong miyembro pag-usab sa Konseho sa Trinidad, nagkanayon nga kinahanglan ang katawhan mupili og mga lider nga anaay maayong pagkatawo.
“Importante ang moralidad sa lider nga atong pili-on,” iyang pagpahinumdom kanako.
Iyang gipasabot nga kakuhaan og base ang kinaiya o batasan sa mga mikandidato kun maayo ba ang ilang binuhatan kay mu-reflect kini diha sa pagpanerbisyo sa katawhan.
Usa sa tan-awon kuno sa mga tawo nga mupili kun limpyo ba ang pagkatawo sa maong magpapili.
“Dili g’yud pili-on ang anaay lama sa korapsyon o mga kurakot,” matud ni Gonzales.
Si Sen. Ping Lacson kinsa nianhi sa Bohol nipahinumdom usab sa katawhan nga dili botaran ang mga korap nga opisyales sa gobyerno.
“Huwag natin iboto ang mga magnanakaw sa gobyerno natin.”
“These are the people who will step funds from the coffers to recoup their election expenditures,” dugang pa ni Lacson kinsa kandidato pagka-Presidente.
Maong dili magpataka-taka sa pagpili ilabina kun dinagkong kuwarta ang gipalihok sa mga magpapili. Mamawi kana sila panahon nga sila mudaug. Delikado. Luoy ang katawhan ug ang lungsod.
Si Noy Rese bokal sa iyang adbokasiya sa pagsulti sa katawhan sa mga binuang nga gibuhat sa mga namunoan sa lungsod. Ug iyang saad nga dili siya muhunong niini bisan pa og kasuhan sa mga pulitikong hilig og pasaka og kaso aron patak-umon ang ilang mga kritiko.
Kay matud ni Noy Rese, walay dautan sa pagsulti sa kamatuoran. Ang dautan ang pagpakahilom bisan nahibalo sa tinuod nga panghitabo. Dautan usab ang pagtabon sa kamatuoran.
Crucial ang pagpili matud ni Noy Rese, busa, ayaw ibaylo ang imong boto sa salapi sa mga korap nga pulitiko nga gustong muhawid og laing termino sa nagkadaiyang opisina de gobyerno.
Panalipdi kanunay ang maayong interes sa katawhan ug sa imong lungsod.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Mudawat lamang og seryoso ug dili binuang. Mag-amping kita, mga Bol-anon!
