NAGPAGAWAS si Governor Art Yap sa Executive Order nga temporaryong nagdili sa pagpasud dinhi sa Bohol sa mga live poultry, poultry products ug by products, domestic ug captured wild (ornamental) birds gikan sa mainland Luzon tungod sa hulga sa bird flu.
Ang EO gipagawas sa gobernador kaniadtong Marso 9, 2022 nga molanat sa 30 ka adlaw nga magsugod dayon human sa pagpagawas sa kamandoan.
Ang mga poultry products ug by products naglakip sa semen, table eggs, salted eggs, quail eggs ug uban pa.
Matod sa gobernador nga tumong niining ma protektahan ang P1.8 billion nga poultry industry dinhi sa lalawigan gikan sa bird flu.
Una niini, gibutyag ni Bohol provincial veterinarian Dr. Stella Marie Lapiz nga gibantayan karon nga dili makasud dinhi sa lalawigan ang bird flu.
Kini human nakompirma didto sa Luzon ang bag-ong kaso sa bird flu partikular sa lalawigan sa Bulacan ug Pampanga.
Matod ni Lapiz nga lakip sa mga lakang nga gihimo dinhi sa Bohol ang pagpahigayon og surveillance sa mga migratory birds.
Gawas niini, duna say gihimong border control ug pagsusi sa mga moabot dinhi sa Bohol nga mga manok, piso, balot o itlog nga gikan sa Luzon diin kuyog niini ang gikinahanglang requirements nga magmatuod nga kini gikan sa rehistrado nga farm nga regular nga nagpaubos sa avian influenza testing. (RTB)
