NINDOT kaayo ang kultura. Halawom ang iyang dut. Malungtaron ang iyang epekto. Sukwahi sa pulitika nga inigkahurot sa atong nadawat nga inangayan sa eleksyon, human na. Sukwahi sa ekonomiya nga inig-ka-mahal sa palaliton, bagutbot ang atong paabuton.
Ang kultura hinay ang dagayday apan taas ang lahutay. Usa sa labing lawom nga manipestasyon sa kultura mao ang musika. Adunay musika alang sa relihiyon ug ispirituhanong kinabuhi. Adunay musika alang sa lingaw-lingaw, pagbangotan, hudyaka ug pamalandong. Tanang yugto sa atong kinabuhi mahimong nuntan sa musika. Lain-laing matang sa musika.
Sa atong kinabuhi dinhi sa atong minahal nga lalawigan sa Bohol, aduna usab kitay matawag nga musikang Bol-anon. Mga awit nga minugna sa mga Bol-anong kompositor ug giawit sa Bol-anong mang-aawit.
Ang mga batan-on karon nahilig sa mga alingugngog nga matang sa musika. Tingale wala pa sila makadungog sa mananoy nga awit ni Arthur Ungab, alumnus sa Bohol Institute of Technology, kinsa nahimo nang mananaog sa mga bangga sa awit didto sa Sugbo ug dinhi sa ato. Gani, bag-o pa siyang mipauli gikan sa dugayng pagtukar sa nagkalain-laing lugar sa China.
Paminawa ninyo sa Youtube ang awit nga DAMGO MAN LANG. Musika ni Fr. Tikyu Solis ug titik ni Atty. Jun Amora. GUGMA, tinagik ning inyong magsusulat ug musika ni Romeo Mascarinas. PAGPAKABANA, komposisyon ni Eddie Orig ug gi-awit ni Arthur Ungab, OO o DILI, KALIWAT NGA BOL-ANON, awit kabahin ni PRES. CARLOS P. GARCIA nga sinulat ni Rudy Tutor, BANGON IGSOON, ug daghan pang uban.
Daghan na sab karong mga binag-ong uso nga komposisyon sa mga batan-ong Bol-anon. Nagmadaugon usab kini sa mga songwriting contest dinhi ug sa Sugbo apan daku ang atong kasibut nga ipatunhay gihapon ang Musikang Binisaya apan nindot gihapon ang tono ug dili lunsayng Binisaya gihapon ang mga pulong. Nianang paagiha dili mapapas ang Kulturang Bol-anon.
