Ni Wilson Auguis Subrio
ISIP hul-os nga pagsuporta sa mga mag-uumang Bol-anon, personal nga gibisita ni Gobernador Aris Aumentado ang pag-apud-apod sa Department of Agriculture (DA)-7 sa P153 milyones nga kantidad sa mga hybrid nga binhing-humay ug abono nga gipahigayon sa Brgy. Bayongan Covered Court sa lungsod sa San Miguel, Sabado, Septiyembre 16.
Matud ni Gob. Aris, mao kadto ang ikaduhang adlaw sa Fertilizer Discount Voucher Roll Out. Kauban sa gobernador ang iyang Executive Assistant Nunila Pinat.
“Personal nato nga gibisita sa Barangay Bayongan Covered Court, San Miguel, ang pagpanghatag og Hybrid Rice Seeds ug Triple 14 Complete Fertilizer sa DA VII niadtong Sabado Septyembre 16, atol sa ilang ikaduhang adlaw sa Fertilizer Discount Voucher Roll Out isip atong pagsuporta sa maong kalihukan. Kauban nato didto si Manay Nunila Pinat, ang atong Executive Assistant,” matud ni Gob. Aris.
Ang probinsya sa Boh mao ang labing una nga nakapahigayon og FDV roll out sa tibuok Region VII sa 45 ka mga lungsod, wala’y labot niini ang Panglao, Dauis ug Tagbilaran City.
Preparasyon kini para sa atong Dry Season Cropping sa buwan sa Oktubre.
P153 Milyones ang Target Allocation sa tibuok Region, pasabot nga P73 milyones alang sa abono ug P80 milyones alang sa binhi.
Matud sa gobernador, sa probinsya sa Bohol, 30,793 ang mga Rice Farmer Beneficiaries, nga dili lang kay enrolled sa RSBSA, encoded usab sa Farmers and Fishery Registry System ang ilang ngalan, kay sumala pa ni Maria Chona Maleza, ang Provincial Rice Action Officer, nga kini ang basehan sa Central Office sa mahatagan og voucher. Basin ana-a pa’y mga Rice Farmers nga wala pa malista sa FFRS, bisitaha palihog ang inyong Municipal Agriculturist.
“Nalipay ako sa madasigon nga lakang sa atong mahal na Pangulong Ferdinand Marcos Jr. sa pag-implementar aning Masagana Rice Industry Development Program (MRIDP) sa Department of Agriculture (DA), kay tinguha sa mahal na presidente ang pagpausbaw sa atong National Rice Sufficency, mao man usab kita dinhe sa atong probinsya,” matud ni Aris.
“Mao man nga aduna kita’y interventions pag-alibyo ning grabe’ng pagsaka sa presyo sa bugas,” dugang niini.
Nibutyag usab ang amahan sa probinsya nga P30M ang alokasyon alang sa binhi ug P30M alang sa abono ug hapit na kini ipanghatag ngadto sa mga Rice Farmers, pinaagi sa OPA.
“Salamat sa Labawng Makagagahom nga sa miaging semester, aduna ta’y yield nga 3.6 metric tons per hectare, labaw kaysa kasagaran nga ani nga 2.73 metric tons ra per hectare. Padayon kita mag-ampo nga bisan tuod ingon ang PAGASA nga mabati ang El Niño sa ikaduhang semester, unta, dili kini makaapektosa atong mga rice farmers ug sa ilang kaumahan,” panapos sa gobernador.
