Ni Wilson Auguis Subrio
MAO kini ang maayong balita nga gipaambit ni Gob. Aris Aumentado sa social media kaniadtong Merkules, Septiyembre 20.
“Nibisita sa atong buhatan ang mga opisyales sa ZMW Group aron ipaabot kanato ang ilang plano nga magtukod og solar power plant sa Lungsod sa Corella,” suma ni Gob. Aumentado.
Kauban ni Bise Gobernador Dionisio Victor Balite ug Corella Mayor Juan Manuel Lim, nahisgutan nila ang sitwasyon sa maong plano ug ang pwedeng himuon nga tabang sa iyang administrasyon aron mapadali kini.
“Kung mahuman na kini puhon, dako kini og ikatabang sa pagsiguro sa suplay sa kuryente diri sa atong probinsya ug ma-ampingan usab ang atong kinaiyahan, kay renewable source man usab kini,” dugang pa sa amahan sa probinsya.
Sa niaging tuig, ang kompanyang PetroGreen Energy Corporation (PGEC) nisulod sa Brgy. San Vicente, lungsod sa Dagohoy aron motukod og solar power plant ug kasamtangang gitrabaho ang maong unang solar farm sa probinsya sa Bohol.
Samtang ang San Miguel Global Power (SMGP) nisulod na kaniadtong niaging buwan.
Kini gikumpirmar mismo ni Gob. Aris diin nibisita kaniya ang SMGP alang sa pormal nga pagpakigsabot kabahin sa battery energy facility nga maga-operate sa Imelda, Ubay niining maong tuig.
Usa kini ka facility nga magasuplay og 20 MW ngadto sa NGCP Power Grid.
Kon mag-operate na kini, dako kini nga tabang aron secured ang kuryente sa probinsya, nga usa sa duha ka haligi nga mao ang power ug water.
Ug kon modaghan ang solar farms sa Bohol, mahuman na ang pipila ka dekadang kakuwang sa enerhiya sa lalawigan ug gilauman nga mobarato usab ang kuryente.
