KAPOBREHON ang usa sa numero-unong hinungdan nganong manulis ug mangawat ang ubang kaigsoonan aron ibuhi sa pamilya o alang sa ilang bisyo sama sa sugal, inom, sigarilyo, ilegal nga drugas o unsa pa diha.
Sa niaging gabii, gisulod sa kawatan ang tindahan sa usa ka kagawad sa lungsod sa Catigbian.
Base sa nigawas nga taho, ang tag-iya sa maong convenience store mohatag og ganti sa makahatag og klarong impormasyon sa kawatan.
Nakita sa CCTV ang hulagway sa kawatan apan dili klaro tungod kay black and white ang kuha niini.
Matud pa, ang maong kawatan nagdala og hinagiban. Maayo gani wala hilabti ang tindera sa maong tindahan.
Tinuod nga gihimong rason sa uban ang kapobrehon aron mangawat o manulis, apan dili kini balidong katarungan.
Bisan unsa kalisod sa kinabuhi, maningkamot nga mabuhi ang kaugalingon o pamilya nga dili manghilabot sa butang nga gipanag-iya sa uban (motrabaho sa legal nga pamaagi).
Kay kon masakpan nga mangawat, uwaw kaayo ug lagmit pa’ng makulatahan o mapulisan.
Ug karon kay moderno na man ang panahon, mas maayo nga magbutang og CCTV camera/s sa matag tindihan o panimalay aron makatabang sa pagsulbad sa krimen. Mas maayo kon klaro o tin-aw ang CCTV cameras.
Ana-a usab ang sugyot sa uban nga pahaiton ang pamalaod sa Pilipinas ilabina ang silot.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
