Ni Wilson Auguis Subrio
KAGAMHANANG Probinsyal sa Bohol (PGBh) pinaagi ni Gobernador Aris Aumentado nihatud og kinatibuk-ang P1,920,000.00 alang sa 47 ka lungsod ug 1 ka siyudad diin tag P40,000.00 ang nadawat sa matag Senior Citizens Federation sa maong mga lungsod ug dakbayan.
Kini ang malipayong gipaambit ni Gob. Aris pinaagi sa internet world.
“Gusto nato makasiguro nga ang Cash Assistance para sa atong mga federations sa Senior Citizens, sa atong 47 ka mga lungsod ug usa ka dakbayan, mapahimuslan sa maayo nga pamaagi ning atong pinangga nga mga seniors,” matud ni Gob. Aumentado.
“Mao man nga personal nato kini nga giapod-apod ngadto sa nagkalain-laing lungsod, sugod niadtong Septyembre 6, sa kantidad nga P40,000 kada lungsod. Nikabat og P1,920,000 tanan ang atong gipanghatod nga cash assistance ug ato kini gitunol mismo sa Federated President ug OSCA Head. Ang pondo niini gikan sa atong buhatan sa Governor’s Office,” dugang ni Aris.
Matud sa kugihan nga amahan sa probinsya, kini nga Cash Assistance Pay Out alang sa mga Municipal Senior Citizens Association Federation, gipahigayon sa OPSWD ug PTO. Uswagan kini sa sunod tuig diin ang ipanghatag P50,000 na.
“Nalipay ako nga sa atong mga pagpamisita, nakumusta nato ang kahimtang sa atong mga haligi sa komunidad. Ako sila gidasig nga magpuyo nga himsog kay daghan kita og plano para kanila, kay importante kanato ang atong mga katiguwangan,” panapos sa kasamtangang amahan sa mga Bol-anon.
