HANGTUD karon, kutob lang sa istorya ang gobyerno sa Pilipinas mahitungod sa gipangbuhat sa China sa West Philippine Sea (WPS) lakip na ang Scarborough Shoal.
Nireklamo ang mga mananagat sa Zambales tungod sa pagsige og pangharass sa China pinaagi sa Chinese Coast Guard sa mga Pinoy nga nanginabuhi sa West Philippine Sea ilabina sa Bajo de Masinloc.
Maihap ra kuno sa tudlo ang barko sa Philippine Coast Guard (PCG) nga nagpatrolya sa maong kadagatan, binali sa China nga nagkadaghan.
Usa sa mga mananagat nga gikuhaan og reaksyon sa GMA News niingon nga walay barko sa Pilipinas nga nialalay nila kon managat sa WPS o Scarborough Shoal.
Ang National Security Adviser nga si Eduardo Año, nimando nga kanunayon ang pagpatrolya sa maong giilugan nga teritoryo.
“Sec. Año has directed the Nolcom and PH Coast Guard to increase maritime patrols in WPS, including the Bajo de Masinloc area,” matud pa ni Usec. Jonathan Malaya, Spokesperson, National Task Force West PH Sea.
“Scarborough shoal and Philippine Rise are among our priorities for maritime domain awareness and patrols,” dugang pa niini.
Mayorya sa mga Pinoy pabor nga lugwayan ang panagtinabangay sa militar sa Pilipinas ug Estados Unidos, matud sa survey.
Ang China maoy usa sa gidudahan nga moduslit aron mahitabo ang gikahadlukang World War III, ug kini tungod sa ilang gipakitang lakang karon pa lang daan.
Ang Pilipinas kinahanglan nga mopili og pinakalig-ong kasandigan nga mao ang Amerika ilabina kabalak-an ang mga lihok sa giilang higanteng dragon nga mao ang China.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
